Wasu ƴan siyasar Amurka na kiran a hana Mamdani hawa kujera, a kore shi daga ƙasar – ko hakan na iya yiwuwa?

Bayan samun nasarar Zohran Mamdani a zaɓen Mayor na birnin New York, wanda ya zama Musulmi na farko kuma dan asalin Kudancin Asiya na farko da ya lashe matsayin, wasu masu ƴan Republican a Washington sun fara bin matakin dakatar da shi daga hawa kujerar.

TIMES HAUSA ta tattaro cewa tsohon shugaban ƙasa Donald Trump ya yi barazana ga taƙaita kuɗaɗen tarayya ga birnin idan Mamdani ya yi nasara, tare da yaɗuwar kalaman da ke ƙoƙarin zargin halaccin kasancewarsa a matsayin ɗan kasa.

Haka kuma an zarge shi da “goyon bayan gurguzu,” ba tare da wata hujja ba.

Wasu ƴan majalisar Republican sun buƙaci a binciki tsarin ƴancin Mamdani, suna neman a soke masa takardar zama ɗan kasa tare da mayar da shi Uganda, duk da babu wata shaidar ya aikata laifi.

Andy Ogles, ɗan majalisar Republican, ya ce: “Idan Mamdani ya yi ƙarya a takardun neman zama ɗan ƙasa, ba shi da hurumin zama ɗan ƙasa balle kuma ya zama Magajin Gari.”

Randy Fine daga Florida ya ƙara da cewa Mamdani “bai cika sharuɗɗan zama ɗan ƙasa ba,” duk da cewa bayanan da TIMES HAUSA ta tattara sun tabbatar da cewa Mamdani ya shiga Amurka tun yana ɗan shekara 7 a 1998, ya kuma zama cikakken ɗan ƙasa a 2018.

Masana shige da fice sun tabbatar da cewa babu wata shaida da ke nuna ya yi ƙarya a aikace-aikacen da ya gudanar har kawo yanzu.

Lauyan shige da fice, Jeremy McKinney, ya shaida cewa: “Kwace matsayin kasancewa ɗan ƙasa mataki ne mai tsauri, kuma ya buƙaci samun tabbatacciyar hujja. Babu wata shaida a kan Mamdani.”

Zarge-zargen siyasa da ɓatanci

TIMES HAUSA ta tattaro cewa zarge-zargen sun fara ne tun lokacin da Mamdani ya lashe tikitin jam’iyyar Democrat a bazarar bana, yayin da Ogles ya rubuta wasiƙa ga Ma’aikatar Shari’a yana danganta Mamdani da goyon bayan “al’umma masu tsattsauran ra’ayi,” bisa waƙar rap da ya rubuta a 2017 wadda ta yi suka ga hukuncin “Holy Land Five.”

Masana sun ce waƙar ba ta kai matsayin goyon bayan ta’addanci ba.

Haka kuma Mamdani ɗan ƙungiyar Democratic Socialists of America, DSA ne, wadda ba jam’iyyar kwaminisanci ba ce.

Masana tarihi, ciki har da Harvey Klehr, sun tabbatar da cewa DSA “ba ta da aƙida irin ta kwaminisanci.”

Kiran hana shi hawa kujera

Ƙungiyar New York Young Republican Club ta ɗauki matakin jingina masa zargin karya Sashe na 14 na Kundin Tsarin Mulkin Amurka, tana ƙoƙarin ganin an hana shi shiga ofis.

Amma masana doka sun bayyana cewa hakan ba zai yiwu ba, domin sashen yana aiki ne kan waɗanda suka shiga tawaye ko ba wa maƙiya taimako a lokacin yaƙi.

Ƙalubalen ƙwacewa mutum kasancewa ɗan ƙasa

Ƙwarraru sun bayyana cewa ko da gwamnati ta nemi soke masa takardar zama ɗan ƙasa, hakan na buƙatar kotu ta tabbatar da “ƙwaƙƙwarar hujja mai tasiri.”

Cassanda Burke Robertson, masaniyar doka, ta ce wannan mataki “ba zai yiwu ba kwata-kwata” a kan Mamdani.

Masu rajin kare haƙƙin Musulmi, CAIR, sun bayyana hare-hare kan Mamdani a matsayin “tsantsar nuna wariya da ƙiyayya ga Musulmi.”

A hirarsa da MSNBC, Mamdani ya ce: “Ƙin Musulunci ya zama ruwan dare. Abin da yake faruwa shi ne ƙin amincewa cewa Musulmi na daga cikin al’ummar wannan birni.”