UNICEF Ta Bayyana Katsina, Kano Da Jigawa a Matsayin Jihohin Da Suka Fi Yawan Yaran Da Ba Sa Makaranta a Najeriya

Hukumar Kula da Yara ta Majalisar Ɗinkin Duniya (UNICEF) ta bayyana cewa jihohin Katsina, Kano da Jigawa suna da kaso 16% na yara 10.2 miliyan da ba sa zuwa makaranta a Najeriya.

A wurin taron ƙaddamar da rahoton Nigerian Child 2025 da aka gudanar a Kano, TIMES HAUSA ta tattaro bayanai cewa hukumar ta yi alƙawarin ƙara tallafawa gwamnatoci wajen farfaɗo da tsarin kiwon lafiya, ilimi da samar da abinci mai gina jiki.

Shugaban Ofishin UNICEF na Kano, Rahama Farah, ya ce Kano tana da kusan yara 900,000 da ba su zuwa makaranta, Jigawa sama da 330,000, yayin da Katsina ke da fiye da 300,000.

“Iya Katsina, Kano da Jigawa a haɗe sun samar da kaso 16 cikin 100 na ƴan Najeriya miliyan 10.2 da ba sa zuwa makaranta,” in ji Farah.

TIMES HAUSA ta kuma fahimci cewa Farah ya yi nuni da rahoton NDHS 2024 wanda ya nuna cewa yankunan uku na fama da matsanancin rashin abinci mai gina jiki.

A cewar rahoton, matsalar rashin samun cikakken girma (stunting) ta kai kaso 64.6% a Katsina, kaso 55.7% a Jigawa, da kaso 51.9% a Kano.

Farah ya ce duk da wannan babban koma-baya, shirye-shiryen UNICEF a yankin suna taimakawa wajen ƙara samun damar kiwon lafiya, ilimi da ciyar da yara abinci mai gina jiki.

UNICEF, in ji Farah, ta yaba wa Gwamnatin Katsina bisa biyan fiye da naira biliyan 1 domin siyan tamowa (RUTF) a ƙarƙashin Child Nutrition Match Fund, yayin da Kano da Jigawa suma suka bayar da kusan wannan adadi domin magance matsalar rashin abinci mai gina jiki a jihohinsu.

TIMES HAUSA ta tattara cewa UNICEF za ta ci gaba da haɗin gwiwa da gwamnatoci domin magance matsalolin da ke barazana ga ci gaban dukkan yara a Najeriya.