Soludo ya lashe zaɓen gwamna, matsayin jam’iyyun siyasa ya ƙara bayyana a Anambra

Ɗan takarar jam’iyyar All Progressives Grand Alliance (APGA), Farfesa Chukwuma Charles Soludo, ya lashe zaɓen gwamnan Jihar Anambra da aka gudanar a ranar Asabar, 8 ga Nuwamba 2025, bayan samun ƙuri’u 422,664 a sakamakon zaɓen da Hukumar Zaɓe Mai Zaman Kanta ta Ƙasa (INEC) ta bayyana a Awka.

Mai Tattara Sakamako na INEC, Farfesa Edoba Omoregie ne ya ayyana Soludo a matsayin zakara, inda ya doke Nicholas Ukachukwu na APC wanda ya samu ƙuri’u 99,445, da kuma ɗan takarar YPP, Sir Paul Chukwuma, wanda ya zo na uku da ƙuri’u 37,753.

INEC ta tabbatar da cewa jam’iyyu 16 ne suka shiga zaɓen, wanda ya gudana cikin yanayi mai cike da samun tsaiko a wasu wurare amma gaba ɗaya cikin kwanciyar hankali ba tare da tashin hankali ba.

TIMES HAUSA ta fahimci cewa adadin masu kaɗa ƙuri’a da aka yi wa rajista a jihar ya kai 2,788,864, inda 598,229 suka samu damar shiga rumfunan zaɓe.

Jimillar ƙuri’un da aka kaɗa sun kai 595,298, yayin da aka yi watsi da ƙuri’u 11,244 sakamakon kurakurai daban-daban a rumfunan zaɓe 21 da ke faɗin jihar.

A jawabin da ya karanta a hedikwatar INEC da ke Awka a yau Lahadi, Farfesa Omoregie ya ce, “Jimillar ƙuri’un da aka tabbatar da sahihancinsu sun kai 584,054, yayin da adadin ƙuri’un da aka ƙi karɓa ya kai 11,244. Zaɓen ya gudana cikin lumana kuma sakamakon ya dace da ƙa’idar da kundin mulki ya tanada.”

Omoregie ya ƙara da cewa “Akwai wasu wurare da aka samu matsaloli a Anambra West, Anaocha, Awka South da Onitsha South, inda hakan ya shafi kuri’u 10,481 da aka soke. Sai dai tazarar da ke tsakanin manyan ƴan takarar ba ta canza sakamakon gaba ɗaya ba.”

Bayan kammala tattara bayanai daga dukkan kananan hukumomi, Farfesa Omoregie ya bayyana a hukumance cewa Soludo ya cika ka’idar samun kuri’u mafi yawa tare da kashi 25 a wajen kananan hukumomi fiye da kashi biyu bisa uku, wanda ya cancantar da shi zama zakara bisa doka.

TIMES HAUSA ta tattaro cewa Soludo na APGA ya samu nasara a dukkan ƙananan hukumomi 21 na jihar, abin da ya sanya zaɓen ya kasance mai tsarin “gagarumin rinjaye.”

Wannan nasara na nufin Soludo zai cigaba da wa’adinsa na biyu a matsayin gwamnan Anambra tun bayan rantsar da shi karo na farko kusan shekaru huɗu da suka gabata.

INEC ta kuma tabbatar da cikakken rabon ƙuri’un tsakanin jam’iyyu kamar haka: A – 224; AA – 1,145; AAC – 292; ADC – 8,208; APC – 99,445; APGA – 422,664; APM – 892; APP – 73; BP – 126; LP – 10,576; NNPP – 525; NRM – 36; PDP – 1,401; SDP – 241; YPP – 37,753; ZLP – 453.

Wannan sakamakon ya sake tabbatar da rinjayen APGA a siyasar Anambra, kasancewar al’ummar jihar da dama sun bayyana farin cikinsu da yadda aka gudanar da zaɓe mai cike da lumana da ingantaccen tsari.

INEC ta yi alƙawarin cigaba da inganta tsarin zaɓe, yayin da ƙungiyoyin sa ido suka yaba da yadda aka gudanar da zaɓen duk da rahotannin ƴan wurare ƙalilan da aka samu matsaloli.