Sojojin Najeriya sun ceto mutum 86, sun kama ƴan bindiga 29 bayan artabu da Boko Haram
Don karanta labaran mu kai-tsaye a Facebook
Rundunar sojin ƙasa ta Najeriya ta sanar da ceto mutum 86 daga hannun masu garkuwa da mutane, tare da kama ƴan bindiga da masu taimaka musu 29 a yankuna daban-daban na Jihar Borno.
Sanarwar da kakakin Operation Hadin Kai, Sani Uba, ya fitar ta bayyana cewa, sojojin 135 Special Battalion a ƙarƙashin Sector 2 ne suka yi artabu da mayaƙan Boko Haram a ranar 9 ga Nuwamba, a yankin Dutse Kura.
Sanarwar ta ce, “Ƴan Boko Haram sun kai hari kan matafiya a hanyar Buratai zuwa Kamuya. Sojojinmu sun yi hanzarin kai ɗauki, wanda ya sa maharan suka tsere. Sai dai an bi diddiginsu zuwa Mangari, inda aka ci ƙarfin su.”
Daga nan sojojin suka shiga dazuka domin ci gaba da aiki.
Sanarwar ta ce, “Mun gano sansanoni 11 na ƴan ta’adda. A nan muka ceto mutum 86, ciki har da mata da ƙananan yara. Mun kuma ƙwato bindigar AK-47, harsasai da wasu makamai.”
Sojojin sun ce za su ci gaba da kai farmaki don lalata dukkan sansanonin Boko Haram da sauran ƴan bindiga a yankin Arewa maso Gabas na Najeriya.
Don karanta labaran mu kai-tsaye a Facebook