Sojoji sun buɗe wuta kan ƴan sanda a Anambra bayan kammala zaɓen gwamna

Sojoji da ke bakin shingen bincike a kan titin Onitsha sun buɗe wuta kan wasu jami’an ƴan sanda da ke dawowa daga aikin zaɓe na gwamnan Anambra, abin da ya jawo fargaba a yankin a ranar Lahadi.

TIMES HAUSA ta tattaro daga Sahara Reporters cewa jami’an ƴan sandan sun yi taƙaddama da sojojin a yayin da suke komawa daga zaɓen gwamnan da aka kammala a jihar ta kudu maso gabashin Najeriya.

Rikicin ya kai ga harbin wani jami’in ɗan sanda a kirjinsa da kuma jikkata wasu.

Bidiyon da aka ɗauka na faruwar lamarin ya nuna yadda wasu jami’an ƴan sanda ke ƙoƙarin ceto abokin aikinsu wanda bai sa rigar kare ƙirji ba, suna toshe jinin da ke zuba daga kirjinsa da wani tsumma.

Wani jami’in ƴan sanda a cikin bidiyon ya bayyana cewa, “Yanzu haka muna dawowa daga zaɓen Anambra, sai rikici ya tashi tsakanimu da sojoji. Kafin mu ankara, sai aka buɗe mana wuta. An harbi ɗaya daga cikinmu kai tsaye a kirjinsa, wasu kuma sun jikkata sosai.”

Mai magana da yawun rundunar ƴan sanda a Anambra, Ikenga Anthony, ya tabbatar wa manema labarai faruwar lamarin, yana mai cewa an sasanta matsalar.

Ya ce jami’in da aka harba yana cikin “kwanciyar hankali” kuma an warware duk abubuwan da suka biyo baya.

Ƙoƙarin tuntubar mai magana da yawun rundunar soji, Colonel Appolonia Anele, ya ci tura, domin wayarta ba ta samu shiga ba kuma saƙon da aka tura mata bai samu amsa ba.