Rikicin Manoma da Makiyaya: Kwamishinan ƴan sanda ya jagoranci taron sulhu a Jigawa

Kwamishinan Ƴan Sanda na Jihar Jigawa, CP Dahiru Muhammad, ya gudanar da wani muhimmin taron zaman lafiya da tsaro tare da shugabanni, masu ruwa da tsaki da wakilan al’ummomi daga Gishinawo da Abangawa, bayan ɓarkewar rikici tsakanin manoma da makiyaya a Kirikasamma a Jihar Jigawa.

TIMES HAUSA ta samu daga sanarwar da rundunar ƴan sanda ta Jigawa ta fitar cewa, taron ya gudana ne a Gishinawo, inda dukkan manyan jami’an rundunar, shugabannin ƙaramar hukuma, wakilan masarauta, jagororin Miyetti Allah, shugabannin matasa, wakilan manoma, malamai da dattawa suka halarta.

A jawabin buɗe taro, kwamishinan ya nuna damuwar rundunar kan rikicin, yana mai cewa zaman lafiya da tsaro ba na jami’an tsaro ne kaɗai ba, al’umma gaba ɗaya na da rawar gani da zata ta taka.

Ya ce rundunar ta ɗauki matakan gaggawa domin hana dawowar tashin hankali da kuma tabbatar da adalci ga kowa.

CP Muhammad ya jaddada cewa dole ne ɓangarorin manoma da makiyaya su ci gaba da tattaunawa da girmama juna domin kaucewa sake tashin matsala.

Ya gargaɗi kowa game da ɗaukar fansa, yana mai cewa duk wanda aka samu da aikata tashin hankali zai fuskanci hukunci.

A yayin zaman tattaunawar, mahalarta taron sun bayyana ƙudirinsu na tabbatar da zaman lafiya, tare da ƙarfafa hanyoyin sasanci a matakan gargajiya domin magance saɓani kafin ya rikiɗe zuwa rikici.

An cimma matsaya kan kafa kwamiti na musamman da zai haɗa wakilan ɓangarorin manoma da makiyaya, shugabannin gargajiya da na addini, da jami’an tsaro domin kula da aiwatar da matakan zaman lafiya da kuma ci gaba da tattaunawa akai-akai.

A ƙarshe, kwamishinan ya yaba wa mahalarta taron bisa jajircewa wajen goyon bayan zaman lafiya, ya kuma yi kira ga jama’a da su riƙa kai rahotanni ta hanyoyi na lumana da bin doka, yana mai tabbatar da cewa rundunar za ta cigaba da kare lafiyar jama’a da dukiyoyinsu a faɗin jihar.