Majalissar Ƙoli ta Addinin Musuluci ta ƙaryata zargin “kisan ƙiyayya ga Kiristoci” a Najeriya, ta ce barazana ce ga ƙasa

Majalisar Ƙoli ta Addinin Musulunci a Najeriya (NSCIA) ta yi kakkausar suka ga abin da ta kira “labarin bogi mai cike da hatsari” daga gwamnatin Amurka da ke zargin ana yi wa Kiristoci kisan ƙare-dangi a Najeriya.

TIMES HAUSA ta tattaro daga taron manema labarai da aka gudanar a Abuja cewa majalisar ta bayyana cewa irin wannan iƙirari “na iya lalata mutuncin ƙasa”, domin matsalolin tsaro a Najeriya ba na addini ba ne, sai dai na ta’addanci, laifuka, da matsalolin muhalli.

Sakataren NSCIA, Farfesa Ishaq Oloyede, wanda ya jagoranci jawabin bayan taron haɗin-gwiwar dukkan ƙungiyoyin Musulunci, ya ce Najeriya “ba ta cikin yaƙin addini”.

Ya ce, “Ba ma faɗin kashe-kashen da ake yi wa Musulmi saboda wannan ba yaƙin addini ba ne; matsalar tsaro ce ta ƙasa. Wasu da ke da ƙyama ga Musulunci sun tura labarin ƙarya zuwa ƙasashen yamma, musamman Amurka, har suka jawo hankalin manyan jami’an gwamnatin Amurka cewa wai ana yi wa ‘Kiristoci kisan nuna ƙiyayya’ a Najeriya.”

NSCIA ta ce babu abin da zai nuna ma’anar ‘genocide’

Majalisar ta ce, bisa bayanan da TIMES HAUSA ta tattara daga jawabinta, cewa rahotannin Majalisar Dinkin Duniya da kuma Amnesty International sun tabbatar da cewa babu wata hujjar da ke nuna yunƙurin hallaka wata al’umma ta addini a Najeriya.

A cewar Farfesa Oloyede, “Daga Katsina zuwa Borno, daga Benue zuwa Filato, da ma Kaduna da Kwara, duk Musulmi da Kiristoci na fuskantar hare-hare. Amnesty International ta tabbatar babu wata shaida da ta nuna rikicin na da tushe na addini.”

Majalisar ta yi ƙarin bayani da cewa ƙa’idar 1948 ta United Nations Convention da Rome Statute sun bayyana ‘genocide’ abin da aka yi da “niyyar hallaka ƙabilu ko addini gaba ɗaya ko wani ɓangarensu”.

Ta ce, “Babu wani abu makamancin haka a Najeriya.”

TIMES HAUSA ta kuma tattaro daga rahoton ACLED na 2022 cewa yawan hare-haren siyasa na shafar Musulmi da Kiristoci daidai da juna a Najeriya, kuma babu wata alama ta nuna ƙasar na fama da yunƙurin hallaka Kiristoci.

Ainihin dalilan rikice-rikicen – NSCIA

Majalisar ta bayyana cewa rikice-rikicen tsakiyar Najeriya sun samo asali ne daga matsalolin muhalli, aikata laifuka, da kuma haƙo ma’adinai ba bisa ƙa’ida ba.

“Wannan ba yunƙurin yin mamayar Musulunci ba ne,” in ji rahoton.

“Laifuka ne da neman arziƙi ta hanyar aikata ta’asa.”

Ta ƙara da cewa, gazawar tsawon shekaru wajen tabbatar da tsaro da hukunta masu laifi ta taimaka wajen ƙara taɓarɓarewar lamuran.

Kiraye-kiraye daga Amurka

TIMES HAUSA ta tattaro daga jawabin NSCIA cewa majalisar ta caccaki kalaman wasu ƴan siyasar Amurka da ta kira masu “maganganu marasa kan gado”.

Ta ce lokacin da Shugaba Donald Trump ya kira Najeriya “ƙasa wacce ta wulaƙanta kanta”, hakan ya tabbatar wa jama’a mummunan matsayin da ya ɗauke ta a kai.

Majalisar ta nanata cewa ƙalubalen Najeriya “abin rikitarwa ne, ta’addanci ne, ayyukan ƴan bindiga, rikicin albarkatun ƙasa, da talauci, kuma bai kasance batun addini ba.”

Ta jinjina wa fitattun Kiristoci da suka ƙaryata labarin “genocide”, ciki har da Femi Falana, Femi Fani-Kayode, Reno Omokri da Gwamna Charles Soludo.

Ta ce, “Waɗanda ke ƙirƙirar labarin ƙarya suna neman tayar da fitina ne kawai. Irin wannan rashin kishin ƙasa ne ya rusa ƙasashe irin su Iraq, Libya da Siriya.”

“Rikicin manufa daga ɓangaren ƙasashen waje” – NSCIA

Majalisar ta yi zargin cewa wasu ƙungiyoyin addini na Amurka da wasu ƴan siyasa suna ƙoƙarin gabatar da wata manufa ce ta siyasa da addini a Najeriya.

TIMES HAUSA ta tattaro daga jawabin cewa, an ambaci Sanata Ted Cruz, Mike More da ‘Biafra Republic in Exile’ a matsayin masu yaɗa bayanan ƙarya don karkatar da siyasar Amurka.

BBC ta ruwaito cewa yawancin bayanai da ake amfani da su wajen zargin “kisan ƙiyayya ga Kiristoci” ba su da tabbacin da za a iya tabbatarwa.

Wasu alƙaluman da ake yaɗawa, irin na Bill Maher da Ted Cruz, ba su nuna asali ko cikakkun jerin hujjoji ba.

Masu tsaro, ciki har da Christian Ani, sun shaida cewa, “Ko da yake an kai wa Kiristoci hari, babu wani abu da zai tabbatar da ‘genocide’. Rikice-rikicen Najeriya na da sababbin dalilai daban-daban.”

Masana sun kuma jaddada cewa rikicin makiyaya da manoma ana fassara shi a wurare da yawa a matsayin na addini, alhali rikici ne na ƙasa, ruwa da albarkatun kiwo.