Kotun Ta Yi Hukuncin Ɗaurin Rai Da Rai Ga Nnamdi Kanu, Ta Ƙara Masa Da Shekaru 20 Da 5 Kan Wasu Laifukan

Babbar Kotun Tarayya da ke Abuja ta yi hukuncin ɗaurin rai da rai ga Nnamdi Kanu, wanda ya bayyana kansa a matsayin jagoran kungiyar Indigenous People of Biafra (IPOB), bisa laifukan ta’addanci.

Mai Shari’a James Omotosho ya bayyana hukuncin ne a yau, inda ya zaɓi ɗaure Kanu har ƙarshen rayuwarsa a kan laifuka na ɗaya, huɗu, biyar, da shida, maimakon yanke masa hukuncin kisa.

Alƙalin ya ce, dangane da laifi na uku, Kanu zai yi shekara 20 a gidan yari ba tare da zaɓin biyan tara ba, yayin da a laifi na bakwai kuma za a ɗaure shi shekaru biyar, shima ba tare da zaɓin tara ba.

TIMES HAUSA ta fahimci cewa alƙalin ya bayyana cewa dukkanin hukuncin zai gudana ne lokaci guda (concurrently), ma’ana ba ɗaya bayan ɗaya ba.

A lokacin karanta hukuncin, Mai Shari’a Omotosho ya ce, “Na yanke wa wanda ake tuhuma hukuncin rai da rai a kan laifuka na ɗaya, huɗu, biyar, da shida, maimakon hukuncin kisa. Dangane da laifi na uku, an ɗaure shi shekaru 20 a gidan yari ba tare da zaɓin tara ba. A laifi na bakwai, za a ɗaure shi shekaru biyar ba tare da zaɓin tara ba. Don nuna jin ƙai, na umurci cewa dukkanin hukuncin su gudana lokaci guda.”

Wannan hukuncin na zuwa ne bayan da kotun ta tabbatar da cewa Kanu ya aikata laifukan ta’addanci da ke da nasaba da zaburar da tashin hankali a yankin Kudu maso Gabas da kuma kasancewarsa memba na ƙungiyar IPOB wacce aka haramta.

Wannan hukunci yana nuna tsanani da mahimmancin tsarin shari’a a Najeriya wajen hukunta masu aikata ta’addanci da barazana ga tsaro da zaman lafiyar ƙasa.