Kotu Ta Kama Nnamdi Kanu Da Laifukan Ta’addanci, Ta Ce “Ya Zama Barazana Ga Bil’adama”

Babbar Kotun Tarayya da ke Abuja ta tabbatar da hukuncin laifukan ta’addanci kan jagoran masu fafutukar Biafra, Nnamdi Kanu, a wani hukunci mai daukar tsawon lokaci da ake ci gaba da karantawa a yau.

Alkalin kotun, Mai Shari’a James Omotosho, ya ce gwamnatin tarayya ta tabbatar da dukkan muhimman abubuwan da ke cikin tuhume-tuhumen da ta shigar, inda TIMES HAUSA ta tattaro cewa kotun ta riga ta same shi da laifi a kan kararraki shida daga cikin bakwai da ake tuhumarsa da su.

Wannan na zuwa ne bayan da alƙalin ya kori Kanu daga zauren kotu kan abin da ya kira “mummunar ɗa’a da rashin biyayya” yayin zaman shari’ar na yau Alhamis.

TIMES HAUSA ta fahimci cewa mai shari’ar ya tabbatar da cewa Kanu ya aikata ayyukan ta’addanci, ciki har da ba da umarnin zaman gida dole (stay-at-home) da ya addabi yankin Kudu maso Gabas na tsawon shekaru, zaburar da mabiyansa da jama’a zuwa tashin hankali, koyar da yadda ake hada bama-bamai don kai hari kan gine-ginen gwamnati, da kuma kasancewarsa memba na kungiyar IPOB wacce aka ayyana a matsayin ƙungiyar ta’addanci tun 2017.

Mai shari’a Omotosho ya ce hujjojin bidiyo, rikodin na hira da sakonnin da Kanu ya aika sun tabbatar da cewa “yana sane da abin da yake aikatawa, kuma yana da nufin cimma raba yankin Biafra daga Najeriya ta hanyar tashin hankali.”

Ya ƙara da cewa, “Waɗannan kalaman ba kalmomi bane kawai; kalaman da suka yi sanadiyyar rasuwar jami’an tsaro da ƙona ofisoshin ƴan sanda a wurare da dama.”

A cikin hukuncinsa, alƙalin ya ambaci bidiyon taron “Third World Igbo Congress” da aka gudanar a Los Angeles, Amurka, inda Kanu ya kira mabiyansa da su yi amfani da tashin hankali don ganin Biafra ta ɓalle daga Najeriya.

TIMES HAUSA ta tattaro daga bayanan kotun cewa mahalarta taron sun nuna damuwa tare da tambayarsa ko ya yi la’akari da hanyar sulhu, amma ya dage kan cewa hanya guda tilo ita ce ta tashin hankali.

Mai shari’ar ya kuma ambaci kiraye-kirayen Kanu a lokutan zanga-zangar EndSARS a 2020, inda ya zaburar da masu kiran zanga-zangar don su ƙona ofisoshin gwamnati, kai hare-hare kan gidajen jami’an tsaro da kuma kashe jami’an da iyalansu.

Ya ce, “babu shakka saƙonnin Kanu sun ba da gudumawa ga mutuwar jami’an tsaro da ƙona ofisoshin ƴan sanda a faɗin kasar nan.”

Kotun ta bayyana adadin ɓarnar da ta faru sakamakon kalaman Kanu, inda alƙalin ya lissafa cewa jami’an ƴan sanda 128 ne aka kashe, sojoji 37, da sauran jami’an tsaro 10, yayin da aka ƙona ofisoshin ƴan sanda 164, aka lalata hedikwatocin INEC 9.

A cewarsa, “adadin ɓarnar ya nuna mugun nufin wanda ake tuhuma da kuma irin tasirin kalamansa.”

Mai shari’a Omotosho ya ƙara da cewa Kanu ya umarci mabiyansa da su kai hare-hare kan ofisoshin jakadanci a ƙasar nan, har ma da yin barazanar kashe Jakadan Birtaniya, lamarin da ya kira “alamun matakin ta’addanci irin na ƙasa da ƙasa.”

TIMES HAUSA ta tattaro cewa kotun ta kuma tabbatar da cewa umarnin zaman gida da Kanu ya bayar a ranar 30 Mayu 2021 “ba bisa ƙa’ida ba ne kuma yana daidai da aikata ta’addanci.”

Alƙalin ya kuma ambaci wasu kalamai da rikodin na sauti da Kanu ya yi, inda ya ƙarawa mabiyansa ƙarfin gwiwar ɗaukar makamai domin yaƙi da gwamnati da kashe jami’an tsaro.

Ya ce, “shaida ta nuna cewa IPOB ƙungiya ce da aka haramta, kuma tun bayan haramcin ranar 18 ga Satumba 2017, duk wanda ya ci gaba da bayyana kansa a matsayin memba yana aikata laifin ta’addanci ne.”

A ƙarshe, Mai shari’a Omotosho ya bayyana rashin kare kai da Kanu ya yi duk da damar da aka bashi sau da dama, yana jaddada cewa hujjojin gwamnati “ba su da wani ƙalubale ko tushen da ya rushe su.”

Ya yi nuni da cewa Kanu “ya mai da kansa takura ga bil’adama” kuma “ba zai yuwu ya ci gaba da zama a cikin al’ummar da ta waye ba.”

Duk da wannan hukunci, TIMES HAUSA ta fahimci cewa kotu tana ci gaba da karanta sauran hukuncin kafin ta bayyana asalin hukuncin (sentencing).