Korar Jami’an DSS 115: sabbin bayanai sun bankaɗo manyan laifukan da suka rikita rundunar

Sabbin bayanai da aka tattara daga manyan majiyoyin tsaro sun bayyana dalilan da suka kai gwamnatin tarayya ga sallamar jami’ai 115 na Hukumar Tsaro Ta Farin Kaya (DSS), bayan an same su da laifuka masu barazana ga martabar rundunar.

Majiyoyin sun tabbatar da cewa, binciken cikin gida ya gano aikata rashawa, rashin ɗa’a, da kuma amfani da takardun bogi a matsayin manyan laifukan da suka janyo korar jami’an.

Wani babban jami’in DSS ya shaida wa kafar yaɗa labarai cewa, “Wasu daga cikinsu ma sun fitar da bayanan sirri na gwamnati. Wannan babban laifi ne da DSS ba zata lamunta ba.”

A ranar Talata ne DSS ta wallafa sanarwar korar jami’an a shafinta na X, inda ta gargaɗi jama’a da su guje wa yin wata hulɗa ta aiki da mutanen da abin ya shafa.

Haka kuma ta wallafa hotunansu tare da bayanin korarsu, matakin da ya biyo bayan kama tsofaffin jami’ai biyu, Barry Donald da Victor Godwin, waɗanda ake zargi da damfarar jama’a ta hanyar kwaikwayon jami’an DSS.

Tsaftace cikin gida

TIMES HAUSA ta tattara bayanai daga tushe daban-daban cewa jerin sunayen da aka sallama ya haɗa da waɗanda ke fuskantar hukuncin ladabtarwa tun kafin zuwan sabon Darakta-Janar, Adeola Ajayi.

Wani babban jami’i ya bayyana cewa sabon DG “ya ƙuduri aniyar share duk wani abin da zai ɓata sunan hukumar.”

Ya ƙara da cewa: “Wasu daga cikin waɗannan jami’ai sun zama barazana ga martabar hukumar. An samu ƙorafe-ƙorafe daga waje, kuma bayan bincike, an tabbatar da laifukansu. Sabon DG ba ya lamuntar rashin ɗa’a, yana dawo da martabar DSS.”

Wata majiyar cikin gida ta ce wasu daga cikin jami’an an taɓa yi musu tambari a zamanin tsohon DG, Yusuf Bichi, amma daga baya suka maimaita laifukan.

“Da yawa daga cikin laifukan ba sabbi ba ne. Wasu sun yi tunanin komai kamar yadda yake a baya. Yanzu an maido da horo, ɗa’a, da martaba,” in ji shi.

Yawon ƙetare ba tare da izini ba

Majiyar DSS ta shaida cewa kimanin kashi 15–20 cikin ɗari na jami’an da aka sallama sun bar ƙasar ba tare da sun yi murabus yadda doka ta tanada ba.

“An kore su ne saboda rashin bin ƙa’ida. DG yana ƙoƙarin farfaɗo da tsari da bin doka,” in ji majiyar.

Takardun karatu na bogi da sauran rashawa

Wani babban jami’i ya tabbatar wa majiyarmu cewa wasu daga cikin jami’an sun yi amfani da takardun bogi, ciki har da “takardun wata makarantar Larabci ko ma takardun masallaci” a matsayin digiri.

Ya ci gaba da cewa: “Abin da ba zai yuwu ba ne wani da bai bayyana gaskiyar kansa ba ya yi aiki a DSS. Sun taɓa aikata laifukan, shi ya sa gwamnati ta wallafa hotunansu domin kauce wa hulɗa da su.”

Ra’ayoyin masana tsaro

Tsohon Daraktan DSS, Mike Ejiofor, ya shaida cewa sallamar “wani ɓangare ne na gyaran tsarin aikin rundunar.”

Amma masani kan harkokin tsaro, Kabir Adamu na Beacon Consulting, ya soki wallafa hotunan jami’an, yana mai cewa hakan “ya saɓa ƙa’idar tsaron leƙen asiri.”

Ya ce: “DSS ce ke kula da leƙen asirin cikin gida. Wallafa hotunan jami’anta na iya jawo barazana ga rayukansu. Mutanen da suka taɓa kama su na iya ɗaukar fansa.”

Adamu ya yi gargaɗin cewa barin sunayensu a fili na iya jawo yiwuwar ƙasashen waje ko ƙungiyoyin ta’addanci su yi amfani da su.

“Zai zama ƙalubale gare su, samun aiki; rayukansu na iya salwanta,” in ji shi.