Jihohi 28 sun gaza biyan kuɗin fansho da garatuity har naira biliyan 626.81, tsofin ma’aikata na cikin tasku

Kamfanin bincike na BudgIT ya bayyana cewa, tsofaffin ma’aikata na jihohi 28 daga cikin 36 na Najeriya suna bin kuɗin fansho da alawus na ajiye aiki, inda adadin kudin da suke bi suka kai naira biliyan 626.81.

Kamfanin ya ce tsofin ma’aikata daga jihohi takwas kawai ne suka iya biyan dukkan kuɗaɗen yadda ya kamata, sune; Akwa Ibom, Abia, Ebonyi, Borno, Nasarawa, Kebbi, Jigawa da Kano.

Rahoton ya nuna cewa wannan matsalar ta nuna irin “rauni” da ake da shi a tsarin kuɗi na jihohi da kuma yadda ake gudanar da harkokin gwamnati a matakin jihohi.

A cikin bayaninsa, BudgIT ya ce, “Muna hangen irin wannan matsalar ta biyan fansho da garatuity a matsayin abin da zai iya shafar ƙwarin gwiwar tsofaffin ma’aikata da kuma bin ƙa’idar shugabanci a jihohi.”

Wannan hali na rashin biyan haƙƙin tsofaffin ma’aikata ka iya haifar da tsangwama ga rayuwarsu wanda aka ce ya kamata gwamnoni su tabbatar ana biyansu a kodayaushe.

Haka kuma, BudgIT ya jaddada cewa jihohin da suka yi nasarar biyan fansho da alawus yadda ya kamata sun nuna cewa “tsari mai kyau na kasafin kuɗi” da kuma “ingantaccen tsarin karɓar kuɗi daga Asusun Raba Kuɗi na Tarayya (Federation Account Allocation)” suna da muhimmanci.

Tsofaffin ma’aikatan da ke ƙarƙashin tsarin fansho a jihohin da matsalar ta shafa na da haƙƙi su ga gwamnati ta biya su a kan lokaci, domin tabbatar da walwalarsu da kuma mutunta aiyukan su.

TIMES HAUSA ta tattaro wannan bayanin daga rahoton BudgIT mai taken “2024 analysis”.

Wannan lamari na buƙatar saurin ɗaukar mataki daga manyan jihohi musamman waɗanda suka tsaya wajen biyan haƙƙin ma’aikatansu da suka yi ritaya, domin kaucewa ƙara tsananta wahalhalun tsofaffin ma’aikata da kuma kare martabar shugabanci nagari.