“Ina matuƙar takaicin kai jam’iyyata ƙara kotu” – in ji Sule Lamido, mai neman shugabancin PDP na ƙasa

Tsohon Gwamnan Jihar Jigawa, Alhaji Sule Lamido, ya bayyana cewa yana cikin baƙin ciki da takaici kan matakin da ya ɗauka na kai ƙarar jam’iyyarsa ta PDP kotu, sakamakon hana shi shiga jerin masu fafatawa a zaɓen shugabancin jam’iyyar.

TIMES HAUSA ta tattaro cewa, a ranar Talata, Kotun Tarayya da ke Abuja, ƙarƙashin jagorancin Mai Shari’a Peter Lifu, ta dakatar da jam’iyyar PDP daga gudanar da babban taronta da aka shirya a Ibadan, Jihar Oyo, a ranar 15 zuwa 16 ga watan Nuwamba, har sai an gama sauraron ƙarar da Lamido ya shigar.

Kotun ta kuma hana Hukumar Zaɓe Mai Zaman Kanta ta Ƙasa (INEC) saka hannu ko lura da duk wani taro ko sakamakon zaɓe da zai fito daga wannan taron.

Mai shari’a Lifu ya bayyana cewa hujjojin da Lamido ya gabatar sun tabbatar da cewa jam’iyyar ta karya dokokin da ke jagorantar gudanar da irin wannan taron, inda ya ce jam’iyyar ba ta buga jadawalin taron a fili kamar yadda doka ta tanada ba.

“A tsarin demokaraɗiyya, wajibi ne a bi doka da oda. Rashin bin tsarin doka zai lalata tubalin demokaraɗiyya gaba ɗaya,” in ji alkalin.

Lamido, wanda ya yi mulkin Jigawa daga shekarar 2007 zuwa 2015 a ƙarƙashin jam’iyyar PDP, ya bayyana wa manema labarai bayan yanke hukuncin cewa bai taɓa jin zafi irin na wannan lokaci ba tun da yake cikin tafiyar jam’iyyar.

“A wannan lamari, idan jam’iyyata ta yi asara, ni ma na yi asara. Ina jin kamar na yi kuka. Idan ƴan’uwa suka fara faɗa, amana tana ɓacewa, haɗin kan ƴan’uwantaka yana rushewa,” in ji shi cikin damuwa.

Lamido ya ce ya ɗauki matakin kai ƙarar ne saboda an hana shi siyan fom ɗin neman takarar shugabancin jam’iyyar, duk da kasancewarsa ɗan jam’iyyar na gaske tun kafuwar ta a 1998.

Ya ce a ranar 27 ga Oktoba, ya je hedikwatar PDP a Abuja domin siyan fom ɗin, amma aka ƙi karɓarsa saboda rashin isassun jami’an jam’iyyar a ofis.

“Na je a matsayin ɗan jam’iyya na gaskiya, amma aka hana ni damar da doka ta bani. Wannan ne ya tilasta min neman adalci a kotu,” in ji tsohon ministan harkokin wajen.

TIMES HAUSA ta fahimci cewa wasu daga cikin manyan jagororin PDP na Arewa sun riga sun amince da Kabiru Turaki (SAN) daga Jihar Kebbi a matsayin ɗan takara guda ɗaya na shugabancin jam’iyyar, abin da Lamido ya ce ba a sanar da shi ba.

Sai dai wasu rahotanni sun nuna cewa an hana shi fom ɗin ne saboda zargin cewa yana da kusanci da jam’iyyar ADC, wanda ake ganin tana neman haɗa ƙungiyoyin adawa, amma Lamido ya musanta hakan, yana mai cewa, “Eh, ina goyon bayan haɗin kan jam’iyyun adawa ta hanyar ADC, amma ba zan taɓa barin PDP ba. Ni ne daga cikin waɗanda suka gina wannan gida da jinin su. Matsayina yanzu shi ne bayar da shawarwari da gyara hanyar Najeriya.”

A hukuncin da kotun ta yanke, Mai Shari’a Lifu ya jaddada cewa “Lamido zai fi fuskantar asara idan aka ci gaba da taron ba tare da an ba shi damar shiga takara ba.”

Ya kuma nuna cewa Lamido ya nuna ƙwarin gwiwa wajen ɗaukar alhakin biyan diyya idan aka tabbatar da ƙarar tasa ba ta da hujja.

Kotun ta umarci jam’iyyar PDP da ta dakatar da shirin gudanar da taron nata “a Ibadan ko a kowace jiha a Najeriya,” har sai an kammala sauraron ƙarar gaba ɗaya.

Daga nan, kotun ta ɗage sauraron shari’ar zuwa 13 ga Nuwamba, bayan bangarorin biyu sun gabatar da takardun kare kansu da jawabansu.

Wani lauya da ke bin shari’ar ya shaida wa TIMES HAUSA cewa wannan hukunci “na nuni da cewa kotu tana kallon rashin adalci da gazawar bin doka a cikin jam’iyyun siyasa a matsayin barazana ga tsarin dimokuraɗiyya.”

Yanzu dai idanu sun koma kan ranar 13 ga Nuwamba, domin ganin ko kotun za ta tabbatar da dakatarwar ko kuma ta ba da damar gudanar da babban taron PDP a Ibadan.