HASASHEN YANAYI: NiMet ta fitar da gargaɗi kan samun ruwan sama da yiwuwar ambaliya a jihohi biyar

Hukumar Hasashen Yanayi ta Najeriya (NiMet) ta fitar da hasashen yanayi na ranar Asabar, 13 ga Satumba, 2025, inda ta yi gargaɗin samun ruwan sama mai ɗauke da guguwa a sassa daban-daban na ƙasar.

A cewar hukumar, da safe ana sa ran samun ruwan sama a jihohin Katsina, Kano, Adamawa, Gombe, Bauchi, Borno da Taraba.

Da yammaci kuma, rahoton ya nuna yiwuwar ruwan sama a Borno, Adamawa, Taraba, Gombe, Bauchi, Sokoto, Zamfara, Katsina, Kano, Kaduna, Jigawa da Kebbi.

A yankin tsakiyar Najeriya kuwa, akwai yiwuwar samun ruwan sama a Abuja, Benue, Nasarawa da Neja da safe, sannan daga bisani a ci gaba da samun ruwan sama a Neja, Nasarawa, Filato, Kwara, Kogi, Benue da babban birnin tarayya Abuja.

Ga kudancin ƙasar kuma, hasashen ya nuna yiwuwar samun ruwan sama matsakaici a Ogun, Ondo, Oyo, Edo, Delta, Legas, Ribas, Cross River da Akwa Ibom da safe.

Daga baya kuma ana sa ran samun ruwan sama mai yawa a Imo, Abia, Enugu, Anambra, Ebonyi, Oyo, Ondo, Osun, Ogun, Ekiti, Legas, Edo, Delta, Ribas, Bayelsa, Cross River da Akwa Ibom.

NiMet ta yi gargaɗin yiwuwar samun ambaliya musamman a Delta, Legas, Ribas, Akwa Ibom da Cross River, tare da shawartar jama’a a yankunan da ke da rauni da su kasance cikin shiri.

Haka kuma, ta roƙi direbobi da masu tafiya su yi taka-tsantsan yayin da guguwar iska ke tasowa da ruwan sama don guje wa haɗari.