Gwamnatin Neja Ta Ce Makaranatar St. Mary’s Ta Saɓa Umarnin Tsaro Kafin Harin Sace Ɗalibanta

Gwamnatin Jihar Neja ta bayyana damuwarta kan sace ɗaliban St. Mary’s School da ke Papiri, Agwara LGA, inda ta ce makarantar ta karya umarnin rufe makarantun kwana da gwamnati ta bayar saboda barazanar tsaro.

A cikin wata sanarwa da Sakataren Gwamnati, Abubakar Usman, ya fitar, TIMES HAUSA ta tattaro cewa gwamnati ta samu sahihan bayanai tun farko game da yiwuwar hare-hare a yankin.

“Mun ba da umarni ga dukkan makarantun kwana da su rufe saboda barazanar tsaro, amma St. Mary’s ta buɗe makarantar ba tare da sanar da gwamnati ko neman izini ba,” in ji Usman.

Ya ƙara da cewa har yanzu gwamnati na tattara bayanai kan yawan ɗaliban da aka sace, yayin da jami’an tsaro suka fara cikakken bincike da aikin ceto.

Gwamnatin ta umurci sauran makarantu da shugabannin al’umma da su mutunta duk wani umarnin tsaro da ake bayarwa a kowane lokaci.

“Kare rayuka, musamman na yara, shi ne ginshiƙin manufar gwamnati,” in ji SSG ɗin.

TIMES HAUSA ta fahimci cewa wannan hari ya faru ne ƴan kwanaki bayan sace ɗalibai 25 a Maga, Jihar Kebbi, lamarin da ya nuna cewa makarantun yankin suna cikin matsananciyar barazana.