Gwamnatin Najeriya ta fasa cirar harajin kashi 15 cikin 100 kan shigo da fetur da dizal

Hukumar Tsare-tsaren Albarkatun Man Fetur ta NMDPRA ta Najeriya ta tabbatar da cewa shirin aiwatar da cirar harajin kashi 15 cikin 100 (ad-valorem import duty) a kan shigo da fetur da dizal ba ya cikin shirin gwamnati a halin yanzu.

A wata sanarwa da George Ene-Ita, daraktan sashen hulɗa da jama’a na hukumar, ya wallafa a shafinsa na X (tsohon Twitter) a ranar Alhamis, ya ce, “Ya kamata jama’a su sani cewa aiwatar da harajin kashi 15 cikin 100 kan shigo da fetur da dizal ba zai gudana ba.”

TIMES HAUSA ta fahimci cewa wannan sanarwa ta biyo bayan labarin da jaridu suka wallafa cewa Shugaba Bola Tinubu ya amince da shirin gabatar da irin wannan harajin a baya.

Sai dai hukumar NMDPRA ta tabbatar da cewa akwai wadataccen mai a cikin ƙasa, kuma ba a fuskantar ƙarancin kayayyakin man a lokacin da ake da bukatar mai ƙarfi.

“Akwai isasshen man fetur, dizal, da iskar gas (LPG) da ake samarwa daga masana’antun cikin gida da kuma ta hanyar shigo da kaya domin tabbatar da cewa babu giɓin kaya a matatun ajiya da tashoshin mai,” in ji sanarwar.

Hukumar ta gargaɗi masu harkar man fetur da su guji ɓoye kaya ko ƙara farashi ba bisa kasuwa ba, tana mai cewa za ta ci gaba da sa ido sosai don tabbatar da daidaito da wadatar kayayyaki musamman a wannan lokacin da ake da yawan buƙata.

“Muna yaba wa duk masu ruwa da tsaki da ke tabbatar da isar da man fetur a kan lokaci. Al’umma su tabbata cewa NMDPRA za ta ci gaba da kare tsaron makamashi (energy security) a ƙasa,” in ji sanarwar.