Gwamnatin Najeriya ta ce tsaro ya inganta da kashi 80%, duk da gargaɗin Biritaniya kan barazanar hare-hare

Gwamnatin Tarayyar Najeriya ta ce bayanan da ta tattara kan tsaro sun nuna ana samun ci gaba da fiye da kashi 80 cikin 100 wajen rage hare-haren ta’addanci da satar mutane a sassan ƙasar.

Wannan bayanin na zuwa ne a daidai lokacin da gwamnatin Biritaniya ta bayar da sabon gargaɗi ga ƴan ƙasarta da su kauce wa tafiye-tafiye zuwa wasu jihohi saboda ƙaruwar barazanar ta’addanci.

Jihohin da Biritaniya ta bayyana sun haɗa da Borno, Yobe, Katsina, Zamfara, Adamawa, Gombe, tare da wasu jihohin kudu.

Sai dai gwamnatin Najeriya ta ce alƙalumanta na 2025 sun nuna raguwar hare-hare da samun garkuwa da mutane.

A cewar gwamnatin Najeriya, “Daga 2024 zuwa yanzu, mun samu damar gurfanar da ƴan ta’adda da ƴan bindiga sama da 124 a kotu, an yanke musu hukunci. Wasu ciki har da jagororin Ansaru da waɗanda suka kai hare-hare a Asibitin Owo (2022) da Yelwata suna ci gaba da fuskantar shari’a.”

Gwamnatin ta ce ta ci gaba da ɗaukar matakan tabbatar da tsaro duk da rahotannin ƙasashen waje, tana mai cewa halin da ake ciki ba kamar yadda gargaɗin Biritaniya ya nuna ba ne.