Gwamnatin Jigawa ta ɓoye tura wasu ɗalibai zuwa Cyprus, an ƙi tura ƴaƴan talakawa an tura na makusantan gwamnati

Gwamnatin Jihar Jigawa ta sake tura ƙarin ɗalibai zuwa ƙasar Cyprus domin karatun lafiya, amma wannan karon an gudanar da shirin cikin sirri, lamarin da ya tayar da ƙura a tsakanin al’umma da ma wasu tsoffin jami’an gwamnati.

TIMES HAUSA ta tattaro cewa ba kamar yadda aka saba a lokutan gwamnatocin baya na Sule Lamido da Badaru Abubakar ba, lokacin da irin waɗannan shirye-shirye na tallafin karatu ke samun cikakken bayani da watsa hotuna, wannan sabon aikin tura ɗaliban an gudanar da shi ne cikin sirri, ba tare da wata sanarwa ga jama’a ko bayyana sunayen waɗanda suka amfana ba.

Wani tsohon hadimin gwamnati, Zakari Kafin Hausa, wanda ya bayyana zargin, ya bayyana a shafinsa na Facebook cewa gwamnati ta kai ƙarin ɗalibai ƙasar Cyprus cikin satin da ya gabata, amma “ana ɓoye labarin saboda yadda aka fifita ƴaƴan makusantan gwamnati maimakon ƴaƴan talakawa.”

A cewarsa, hakan ya saɓawa alƙawarin da Gwamna Malam Umar Namadi ya yi a lokacin yaƙin neman zaɓe na cewa gwamnatinsa za ta buɗe damar karatu da samar da cigaba ga ƴaƴan marasa ƙarfi.

“Abin takaici shi ne tuni har gwamnatin ƙasar Cyprus ta dawo da wasu daga cikin yaran manyan muƙarraban wannan gwamnatin saboda matsalolin takardu da kuma zargin shaye-shaye,” in ji shi.

TIMES HAUSA ta fahimci cewa, har yanzu ɓangaren gwamnati bai fitar da cikakken jerin sunayen ɗaliban da aka tura ba, kuma babu wani bayani daga hukumomin jihar kan yawan sabbin ɗaliban da aka tura ko tsarin tantancewar da aka bi.

Sai dai a watan Agustan bana, gwamnatin Jigawa ta sanar da cewa ta ɗauki nauyin ɗalibai 184 domin ci gaba da karatun lafiya a ƙasar Cyprus da India, a ƙarƙashin shirin “human development agenda” da ke nufin rage ƙarancin likitoci a jihar.

A lokacin, gwamnatin ta bayyana cewa ta fitar da fiye da naira biliyan 4.1 domin kuɗin makaranta da alawus na ɗaliban.

Sakataren Hukumar Bayar da Tallafin Ɗalibai ta Jihar Jigawa, Sa’idu Magaji, ya bayyana cewa an sanya hannu kan yarjejeniya da jami’o’in da kuma ɗaliban, wadda ta wajabta musu dawowa su yi aiki a jihar bayan kammala karatu.

Sai dai saɓanin wancan lokacin da aka gayyaci ƴan jarida, aka wallafa hotuna, kuma aka bayyana bayanan ɗaliban, wannan ƙarin tura ɗaliban da aka gudanar cikin makon da ya gabata kamar yanda zargin ya bayyana, bai sami irin wannan yayatawa ba, abin da ke haifar da tambayoyi a zuƙatan jama’a.

TIMES HAUSA ta fahimci cewa akwai buƙatar gwamnatin Jigawa ta fito fili ta bayyana sahihan bayanai kan wannan sabon labari na tura ɗaliban domin wanke kanta daga zargin nuna son kai da ɓoye gaskiya ga jama’ar da take yi wa hidima.