Gwamnati ta rage kuɗin aikin Hajji, ta sanya sabon wa’adin biyan kuɗi

Hukumar Alhazai ta Najeriya (NAHCON) ta sanar da sabon ragi kan kuɗin aikin Hajji na 2026 ga maniyyata daga sassa daban-daban na ƙasar, matakin da ya nuna samun babban sauƙi idan aka kwatanta da kuɗin 2025.

Bayanan da Hukumar ta fitar sun nuna cewa maniyyata daga yankin Borno zuwa Adamawa za su biya ₦7,579,020.96, ma’ana an rage ₦748,104.63 daga kuɗin 2025 wanda ya kai ₦8,327,125.59 a shekarar.

Ga yankin Arewa, maniyyata za su biya ₦7,696,769.76, wanda ke nuni da raguwar ₦760,915.83 daga kuɗin bara na ₦8,457,685.59.

A yankin Kudu, kuɗin ya koma ₦7,991,141.76, inda aka samu raguwar ₦792,943.83 daga kuɗin 2025 da ya kasance ₦8,784,085.59.

NAHCON ta wallafa a shafinta na X cewa sauye-sauyen an yi su ne domin sauƙaƙa wa alhazai shirin aikin Hajjin 2026.

Hukumar ta kuma sanar da ranar 5 ga Disamba, 2025 a matsayin sabon wa’adin biyan kuɗin aikin Hajjin.

A cewar hukumar, “Ana shawartar maniyyata su kammala biyan kuɗinsu kafin wa’adin domin tabbatar da sauƙin aiwatar da shirin Hajjin 2026.

Sanarwar ta bayyana cewa, ana iya samun ƙarin bayani a www.nahcon.gov.ng.

Jaridar PUNCH ta bayyana cewa a watan Oktoba shugaban ƙasa Bola Tinubu, ta hannun Mataimakin Shugaban Ma’aikatansa, Sanata Ibrahim Hadeija, ya ba wa NAHCON umarnin gaggauta rage kuɗin Hajji na 2026 da ta sanar a baya.

Wannan na zuwa ne wata guda bayan NAHCON ta sanar da kuɗin da ta amince da su a watan Satumbar 2025.