Fiye da ƙasashe 15 na fuskantar barazanar gwagwarmayar ceton rayuwa saboda tsananin yunwa a duniya, ciki har da Najeriya

Hukumomin Kula da Abinci na Majalisar Ɗinkin Duniya, Hukumar Abinci da Noma (FAO) da Shirin Abinci na Duniya (WFP), sun yi gargaɗin cewa miliyoyin mutane na iya fuskantar yunwa mai tsanani a sassa daban-daban na duniya, yayin da ƙarancin kuɗin tallafi ke ƙara tsananta halin da ake ciki.

TIMES HAUSA ta tattaro daga rahoton haɗin gwiwar ƙungiyoyin da ke hedikwatarsu a birnin Rome, cewa rikice-rikice da tashin hankali ne ke jagorantar ƙarin matsin lamba a mafi yawan ƙasashen da ke cikin haɗarin matsananciyar yunwa.

Rahoton ya bayyana ƙasashen Haiti, Mali, Falasɗinu, Sudan ta Kudu, Sudan, da Yemen a matsayin waɗanda suka fi fuskantar barazanar “yunwa mai haɗarin kisa.”

Sauran ƙasashe da ke cikin “matsananciyar damuwa” sun haɗa da Afghanistan, Jamhuriyar Demokuraɗiyyar Congo, Myanmar, Najeriya, Somalia, da Syria, yayin da Burkina Faso, Chadi, Kenya, da ƴan gudun hijira na Rohingya a Bangladesh suka shiga jerin.

“Muna kan bakin wata masifa ta yunwa wacce za a iya kauce mata gaba ɗaya,” in ji Daraktar WFP, Cindy McCain.

“Rashin ɗaukar mataki yanzu zai ƙara tayar da tarzoma, ƙaura da sabbin rikice-rikice.”

Rahoton ya nuna cewa kuɗin da ake da su don agajin gaggawa sun yi ƙasa ƙwarai da gaske, inda aka samu dala biliyan 10.5 kacal daga cikin dala biliyan 29 da ake buƙata domin tallafawa mutanen da ke cikin haɗari.

Saboda wannan ƙarancin, WFP ta ce ta rage taimakon abinci ga ƴan gudun hijira da mutanen da aka raba da muhallansu, tare da dakatar da shirye-shiryen abincin makaranta a wasu ƙasashe.

A nata ɓangaren, FAO ta yi gargaɗi cewa wannan yanayi na iya lalata ƙoƙarin kare harkokin noma da kiwon dabbobi, “waɗanda suke da muhimmanci wajen daidaita samar da abinci da hana dawowar matsalar yunwa.”

“A yanzu ana buƙatar kuɗi don tallafawa samar da iri, rigakafin lafiyar dabbobi, da ayyukan noma kafin kakar shuka ta gaba ta zo ko wani sabon rikici ya sake ɓarkewa,” in ji rahoton FAO.

Ƙungiyoyin biyu sun nemi haɗin gwiwar ƙasashen duniya da masu ba da tallafi domin hana wannan “yunwa da za a iya kauce mata” daga zama mummunan bala’i da zai shafi rayuka da ƙasashe masu rauni a duniya.