EFCC ta cafke wasu mutane bisa zargin sayen ƙuri’u a lokacin zaɓen gwamnan Anambra

Hukumar Yaƙi da Masu Yi wa Tattalin Arziƙi Ta’annati (EFCC) ta kama wasu mutum uku da ake zargi da sayen ƙuri’u a yankuna daban-daban na Jihar Anambra yayin zaɓen gwamna da aka gudanar a ranar Asabar, 8 ga Nuwamba 2025.

Waɗanda aka kama sun haɗa da Emeka Ilokasia, wanda aka cafke a Mazaɓa ta 2 ta Ƙaramar Hukumar Njikoka; Nwachukwu Loretta, da aka kama a Mazaɓa 2 (008) da ke Awkuzu a Ƙaramar Hukumar Oyi; sai kuma Emuka Chuwudi, da aka damƙe a Garin Umunachi a Ƙaramar Hukumar Dukonukofia.

Jami’an EFCC sun kama su ne a lokacin da ake gudanar da zaɓen, bayan samun bayanan cewa suna ƙoƙarin raba kuɗaɗe domin yaudarar masu kaɗa kuri’a a wuraren zaɓe.

Wata majiya ta tabbatar wa TIMES HAUSA cewa za a gurfanar da su a kotu da zarar an kammala bincike kan laifukan da ake zargin sun aikata.

Hukumar EFCC ta yi gargaɗin cewa za ta ci gaba da sanya ido a kan duk wasu ayyukan da za su iya lalata sahihancin zaɓe a Najeriya, tare da tabbatar da cewa jami’an ta na bin diddigin duk masu ɗaukar nauyin sayen ƙuri’u ko waɗanda ke shiga cikin wannan ɗabi’a.

Wannan mataki ya biyo bayan ƙoƙarin da ake yi a matakin ƙasa domin rage tasirin rashawa da cin hanci da ya daɗe yana dagula tsarin demokaraɗiyya a Najeriya.