Birtaniya ta gargaɗi ƴan ƙasarta kan zirga-zirga a Najeriya, ta bayyana jihohi da wurare mafiya hatsari

Ma’aikatar Harkokin Waje ta Birtaniya (FCDO) ta sake sabunta gargaɗin tafiye-tafiye zuwa Najeriya, tana bayyana yadda tsaro ke ta taɓarɓarewa a sassa daban-daban na ƙasar, tare da ƙaruwar ayyukan ta’addanci, fashi da makami, da garkuwa da mutane.

TIMES HAUSA ta tattaro daga sabon rahoton da aka wallafa a GOV.UK cewa FCDO ta bayyana cewa “tsaro na ƙara taɓarɓarewa a Najeriya, inda garkuwa da mutane, rikice-rikicen ƙabilanci da tashin hankali ke faruwa a kusan dukkan sassan ƙasar.”

An shawarci ƴan kasar Birtaniya da su ɗauki tsauraran matakan tsaro, su sabunta shirin tsira, tare da yin taka-tsantsan a duk inda suka tsinci kansu a Najeriya.

FCDO ta gargaɗi masu dukkan tafiye-tafiye zuwa jihohin Borno, Yobe, Adamawa, Gombe, Katsina da Zamfara, saboda barazana mai tsanani daga Boko Haram da kungiyar ISWAP musamman a manyan hanyoyi, wajajen ibada da wuraren taruwar jama’a.

Haka kuma, jawabin ya tabbatar da cewa “jami’an jin ƙai da kayayyakinsu sukan zama abin hari ga ƴan ta’adda da ƴan bindiga.”

A wasu jihohin ciki har da Bauchi, Kaduna, Kano, Kebbi, Jigawa, Sokoto, Niger, Kogi, Plateau da Taraba, an ba da shawarar guje wa tafiya sai dai cikin gaggawa, har ma da ƙauyukan da ke wajen babban birnin tarayya Abuja.

Rahoton ya kuma yi gargaɗin kan yadda “laifukan tashin hankali, musamman waɗanda ke amfani da bindigogi, ke ƙaruwa har suna shigowa unguwannin mawadata.”

Ma’aikatar ta ce ma’aikatan Gwamnatin Birtaniya a Najeriya suna samun taƙaitaccen izinin fita ne kawai a cikin iyakokin birnin Abuja bisa yawan haɗarin tsaron da ake fama da shi.

An kuma ja hankalin matafiya kan yiwuwar ɓarkewar zanga-zangogi a Abuja, waɗanda kan rikiɗe zuwa tashin hankali cikin gaggawa.

Hedikwatar Birtaniya ta ce yankin Arewa maso Gabas na ci gaba da fuskantar hare-hare, inda sojojin Najeriya ke gudanar da ayyukan yaƙin kawar da ta’addanci, kana akwai barazanar mayar da martani daga ƴan ta’adda.

Ga mutanen da ke Maiduguri, an gargaɗe su cewa “idan tsaro ya sake taɓarɓarewa, zai yi matuƙar wahala a iya barin birnin.”

A yankin Kudu maso Gabas da Kudu maso Kudu, an gargaɗi matafiyan da su guji yankunan tekun Delta, Bayelsa, Rivers, Akwa Ibom da Cross River saboda ayyukan ƙungiyoyin ƴan bindiga da ke kai hari kan bututun mai da kayayyakin man fetur.

A Kudu maso Yamma, ciki har da Legas, jawabin ya ce “fashi da makami, sace mutane, ƙwace motoci da sauran laifukan tashin hankali na yawan faruwa,” musamman a manyan birane, duk da cewa manyan hare-haren ta’addanci ba sa yawan faruwa a yankin.

Duk da haka, ƙungiyar ISWAP ta yi iƙirarin kai wasu hare-hare guda biyu a 2022, ko da yake ba su kai wa baƙi hari ba.

An shawarci matafiya da su yi taka-tsantsan sosai a Legas, musamman a ɓangaren mainland, tare da guje wa zirga-zirga da dare.

A ƙarshe, FCDO ta nemi duk wanda ke cikin yankunan da ake gani a matsayin masu haɗari da su bi ƙa’idojin tsaro na otel, ma’aikata ko masu masauki, tare da sabunta shirin tsira a kai a kai.

Rahoton ya nuna cewa matsalolin tsaro a Najeriya sun samo asali ne daga tashe-tashen hankula da suka haɗa da ta’addanci, fashi da bindiga, rikicin ƙabilanci da ƙungiyoyin ƴan tawaye.

Boko Haram da ISWAP sun ci gaba da kai hare-hare tun 2009, yayin da a Arewa maso Yamma da Arewa ta Tsakiya ayyukan ƴan bindiga suka ƙaru.

A Kudu maso Gabas kuwa, tashin hankali ya ci gaba da faruwa saboda gwagwarmayar ƴan aware, yayin da yankin Niger Delta ke ci gaba da fama da matsalolin fashi, garkuwa da mutane da ɓarnatar da bututun mai.