BBC ta bankaɗo muhimman bayanai kan zargin Amurka na “kisan ƙiyayya wa Kiristoci” a Najeriya
Don karanta labaran mu kai-tsaye a Facebook
Binciken BBC ya gano cewa alƙaluman da jami’an gwamnatin Amurka ke amfani da su wajen zargin ana aiwatar da “kisan ƙiyayya wa Kiristoci” a Najeriya ba su da tushe da za a iya tabbatarwa.
TIMES HAUSA ta tattaro daga rahoton cewa yawancin bayanan sun fito ne daga ƙungiyar Intersociety, wacce ta yi iƙirarin cewa Kiristoci fiye da 100,000 aka kashe tun 2009, da kuma ƙona majami’u sama da 19,000.
Sanata Ted Cruz ya yi amfani da waɗannan alƙaluma wajen kira da a ƙaƙaba wa Najeriya takunkumi. Mai gabatar da shirye-shiryen talabijin Bill Maher ya kuma yaɗa adadin cewa Boko Haram ta kashe “fiye da 100,000”.
Babu hujjoji, babu cikakken bayani – BBC
Binciken ya gano cewa Intersociety ba ta gabatar da jerin wuraren da ta ɗauko alkaluman ba, kuma rahotanninta ba su nuna yadda aka bambanta Musulmi da Kiristoci a kisan ba.
A cewar BBC, yayin nazarin iƙirarin cewa an kashe Kiristoci 7,000 daga Janairu zuwa Agusta 2025, kusan rabin bayanan ba su nuna addinin waɗanda aka kashe ba.
Bayan lissafi, adadin ya fi kusa da 3,000.
Wannan adadi ya yaɗu a hannun wasu ƴan majalisa a Amurka, ciki har da Congressman Riley Moore, wanda ya buƙaci a ƙaƙaba takunkumi kan Najeriya.
Kwatanci da sauran bayanai
TIMES HAUSA ta tattaro daga ACLED cewa tun 2009 an kashe kusan fararen hula 53,000, Musulmi da Kiristoci, a rikice-rikice.
Daga 2020 zuwa Satumba 2025, kusan mutane 21,000 aka kashe.
BBC ta gano cewa alƙaluman da Trump ya yi amfani da su wajen batun CPC sun fito ne daga ƙungiyar Open Doors, wadda ta ce tsakanin Oktoba 2023 zuwa Oktoba 2024, an kashe Kiristoci 3,100 da Musulmi 2,320.
Ƙungiyar ta ɗora laifin kusan kashi ɗaya bisa uku na hare-haren kan “ƴan Bindiga Fulani”.
Sai dai masana sun ce rikicin “manoma da makiyaya” na da alaƙa da filaye da ruwan shan dabbobi ne, ba addini kaɗai ba.
Zargin alaƙa da IPOB
BBC ta ce an taɓa danganta Intersociety da ƙungiyar IPOB, duk da cewa ta musanta hakan.
Nnamdi Kanu ma ya rubuta wa Trump yana zargin “kisan ƙiyayya wa Kiristoci” a kudu maso gabas.
Masana tsaro da gwamnati sun jaddada cewa duk wanda ba ya goyon bayan aƙidar ta’addanci, Musulmi ko Kirista, na cikin barazana a Najeriya.
Don karanta labaran mu kai-tsaye a Facebook