ASUU ta zargi Gwamnatin Tarayya da rashin bai wa ilimi muhimmanci a Najeriya

Shugaban Ƙungiyar Malaman Jami’o’i ta ASUU, Farfesa Chris Piwuna, ya zargi Gwamnatin Tarayya da gazawa wajen baiwa ilimi matsayinsa na muhimmin ginshiƙin ci gaban ƙasa, yana mai cewa yawancin jami’an gwamnati ba sa ɗaukar matsalolin ilimi a matsayin al’amuran ƙasa masu buƙatar kulawa ta musamman.

TIMES HAUSA ta tattaro bayanai daga Tattaunawar Toyin Falola da aka gudanar ta yanar gizo a ranar Lahadi, inda Piwuna ya yi bayani mai tsawo kan yanda tsarin ilimi ke fuskantar naƙasu.

Ya ce rashin sha’awar da ministoci ke nuna wa ilimi na kawo tsaiko ga duk wani gyara mai ɗorewa da ake buƙata.

Ya bayyana cewa manyan ministocin gwamnati kan duba matsalolin ilimi a matsayin alhakin Ministan Ilimi kaɗai.

A cewarsa, “Idan ASUU ta shiga yajin aiki, Ministan Kuɗi yana ganin matsalar a matsayin ta Ministan Ilimi. Ministan Kimiyya da Fasaha ma haka yake gani. Alhali dukkanin ci gaban ƙasa yana dogara da ilimi.”

Piwuna ya ƙara da cewa tsarin kula da ilimi yana fuskantar cikas saboda bambancin ra’ayi da al’adar cin hanci da rashawa a ɓangarorin gwamnati.

Ya ce, “Mu a ASUU muna ɗaukar ilimi a matsayin amfanin jama’a, amma gwamnati ta ɗauke shi tamkar kasuwanci. Wasu suna son a fara amfani da TETFund domin tallafa wa makarantu masu zaman kansu. Hakan ya saɓawa manufar kafa TETFund.”

Wannan tattaunawa ta samu halartar masana da dama, ciki har da mai masaukin baƙi Farfesa Toyin Falola, da Farfesa Francis Egbokhare, Farfesa Sherrifdeen Tella, shugaban NLC Joe Ajaero, da kuma ƴar jarida Grace Edema.

Farfesa Egbokhare ya jaddada cewa matsalolin da suka addabi jami’o’i sun samo asali ne daga rashin shugabanci nagari da kuma taɓarɓarewar gine-gine da lamarin gaskiya cikin gudanarwa.

A nasa ɓangaren, Ajaero ya buƙaci gwamnati da ASUU su koma tsarin ɗaukar matakai gaba ɗaya, ba wai a jami’o’i kawai ba, har ma zuwa firamare da sakandare.

Farfesa Tella ya lura cewa rashin amfani da binciken da malamai ke yi yana janyo koma baya ga ci gaban ƙasa.

Tattaunawar ASUU da gwamnati

Game da zaman NEC na ASUU da ake gudanarwa a Jihar Taraba, Piwuna ya ce tattaunawar da ake yi da gwamnati na gab da kammaluwa.

Ya ce, “Matsalolin sun kusa samun mafita, amma tayin albashin da gwamnati ke yi ba abin karɓuwa bane. Muna shirye mu ɗauki mataki mai tsauri domin kare martabar malamai.”

Ya ƙara da cewa halin talauci da takura da malamai ke ciki ya rage musu kuzarin ƙirƙire-ƙirƙire da gudanar da bincike mai tasiri ga ci gaban ƙasa.

Ya ce, “Wasu daga cikin malamai suna kwana a ofis da iyalansu saboda rashin kyakkyawan yanayin rayuwa. Ta yaya za a ce za su iya samar da binciken kimiyya?”