ISWAP Ta Kai Sabon Hari a Yobe: Ƴan Ta’adda Sun Kashe Jami’in Tsaro, Sun Sace Motoci Biyu

An samu harin ta’addanci a Geidam, Jihar Yobe, inda ake zargin mayaƙan ISWAP sun kashe wani ɗan sanda tare da sace wata motar sintiri bayan sun kai farmaki kan ofishin ƴan sanda na ƙauye da misalin ƙarfe 1:30 na daren Laraba.

Maharan sun shiga ne ta hanyar da ta kai su kai tsaye gaban ofishin ƴan sandan, inda suka yi yunƙurin kwashe motocin da aka ajiye a wajen.

Wani mazaunin yankin, Bashir Baba, ya shaida cewa lokacin da ƙarar ƙararrawa (automatic alarm) ta tashi, ɗaya daga cikin jami’an ya fito domin tantance matsalar, amma maharan suka harbe shi har lahira.

Rahotanni sun nuna cewa maharan sun sace wata motar sintiri, sannan suka ƙona wata dabam da ke wajen ofishin.

TIMES HAUSA ta gano cewa, Gwamnatin Jihar Yobe ta ba rundunar ƴan sanda tallafin motocin sintiri guda 22 a watan Satumba – 21 ga rassan sassan ƴan sanda, da guda ɗaya ga hedikwatar rundunar.

Baba ya ƙara bayyana cewa bayan kammala harin a ofishin farko, maharan sun nufi ofishin Area Command da ke ƴan kilomitoci kaɗan daga wajen, a yunƙurin neman ƙarin motocin.

A cewarsa, “A Area Command ɗin sun ci karo da turjiya daga jami’an ƴan sanda, waɗanda suka jefa musu barkonon tsohuwa, hakan ya tarwatsa su.”

Wasu majiyoyi kuma sun ce maharan sun buɗe ɗakunan tsare mutanen ofishin suka kuma sace wata motar sintiri kafin su gudu.

TIMES HAUSA ta samu bayanan tsaro da ke cewa akwai raɗe-raɗin cewa mayaƙan ISWAP na sake haɗuwa a yankin Yunusari, musamman a Sukdu, Buhari, Mattati da Bulabulin.

Mai magana da yawun rundunar ƴan sanda ta Yobe, Dungus Abdulkarim, ya tabbatar da faruwar lamarin, yana mai cewa ana zargin maharan sun kai harin ne domin sace motocin sintiri, tare da ƙari da cewa bincike na ci gaba.

Wannan na zuwa ne a daidai lokacin da Najeriya ke fama da tashin hankalin tsaro.

A ranar Litinin, ɓarayi sun kai hari GGCSS Kebbi, inda suka kashe ma’aikaci suka kuma yi garkuwa da ɗalibai 25.

Kwana biyu bayan haka kuma, wasu makasan sun farmaki cocin ibada a Jihar Kwara, inda suka kashe mabiya addini tare da yin garkuwa da wasu da ba a tantance adadinsu ba.

Ana cikin wannan yanayi, Ministan Yaɗa Labarai, Mohammed Idris, ya bayyana cewa Shugaba Bola Tinubu ya umarci dukkan hukumomin tsaro su shiga “matakin gaggawa mafi tsauri” domin fatattakar lamarin da ke ƙara ta’azzara.