Dalilin Da Ya Sa Gwamnatin Tarayya Ta Soke Amfani Da Harsunan Uwa A Makarantu – Minista Suwaiba

Gwamnatin Tarayya ta bayyana dalilan da suka sa ta soke amfani da harsunan gida a matsayin harshen koyarwa daga ajin firamare na ɗaya zuwa shida, inda ta ce tsawon shekaru manufofin ba su samar da sakamakon da ake buƙata ba.

TIMES HAUSA ta tattaro cewa Ƙaramar Ministan Ilimi, Suwaiba Ahmad ce ta bayyana hakan a Shirin The Morning Brief na Channels Television, inda ta ce matakin ba yana nufin raina al’adu ba ne, illa kawai inganta daidaito a tsarin koyarwa.

“Najeriya tana da Yaren Gwamnati guda 1 ne, kuma yaren gwamnatin shine Turanci. Lokacin da yaro ya gama koyon harshen uwa, komawa zuwa na gwamnatin yana gagara,” in ji ta.

Ta ce ɗalibai daga yankunan da ake koyarwa da harsunan gida “suna shiga jarabawar ƙasa da ake yi da Turanci, kuma daga baya za su yi takara da takwarorinsu da aka koyar da su cikin Turanci tun farko.”

Prof. Suwaiba ta bayyana cewa duk da jin zafin suka daga wasu ɓangarori, gwamnati ta yi nazari mai zurfi kafin janye manufar.

“Lokacin da mutane suke suka ko suke musanta matakin da muka ɗauka, ina mamakin hakan. Shin ka je wajen da abin ke faruwa ne? Ka binciki me ke faruwa?” tana mai tambaya.

Ta ce ainihin matsalar ita ce yanayin Najeriya, ba wai ingancin harsunan gida ba, domin “muna da arziƙin al’adu amma tsarinmu bai dace da koyarwa da harshen uwa ba.”

Gyaran Manhaja Da Horar Da Malamai

TIMES HAUSA ta tattaro cewa gwamnatin tarayya ta kammala shirye-shiryen horas da malamai domin inganta koyar da karatu da lissafi a matakin farko.

A cewarta, “Zamu horar da malamai domin tabbatar da cewa ɗalibai sun samu ilimini karatu da rubutu da na lissafi yanda ya kamata.”

Ta kuma bayyana cewa manhajar makarantu ta yi nauyi sosai, kuma za a rage darussa da abubuwan da ba muhimmai ba domin daidaita tsarin.

A shekarar 2022 ne Majalisar Zartarwa ta Ƙasa ta amince da manufofin harsunan gida a matsayin harshen koyarwa, duk da cewa an yi gargaɗin cewa aiwatar da manufar zai yi wahala.

Yanzu gwamnati ta ce sake duba dokar ya zama wajibi domin kare ingancin ilimi da tabbatar da daidaiton koyarwa a dukkan sassan Najeriya.