Shettima Ya Bar Abuja Don Halartar Taron G20 Bayan Tinubu Ya Dage Zuwa Saboda Harkokin Tsaro

Mataimakin Shugaban Ƙasa, Kashim Shettima, ya bar Abuja zuwa Johannesburg, Afrika ta Kudu, domin wakiltar Shugaban Ƙasa Bola Ahmed Tinubu a taron shugabannin G20, bisa wani sabon tsari da aka yi sakamakon matsalolin tsaro da ke ƙara kamari a Najeriya.

Shugaba Tinubu, wanda tun da farko aka shirya zai halarci taron, ya ɗage tafiyarsa ne domin ci gaba da karɓar rahotannin tsaro game da tashin hankalin da ya auku a jihohin Kebbi da Kwara kwanan nan.

A cewar bayanin fadar gwamnati da TIMES HAUSA ta samu, Shugaban Afrika ta Kudu, Cyril Ramaphosa, wanda a yanzu ke jagorantar ƙungiyar G20 ya gayyaci Shugaba Tinubu ne tun da farko.

Taron za a gudanar da shi ne daga ranar Asabar, 22 ga Nuwamba, zuwa Lahadi, 23 ga Nuwamba, a Johannesburg Expo Centre, tare da halartar shugabannin manyan ƙasashe mafiya tattalin arziƙin duniya 20, Ƙungiyar Tarayyar Turai, Ƙungiyar Tarayyar Afrika da muhimman cibiyoyin kuɗi na ƙasa da ƙasa.

TIMES HAUSA ta fahimci cewa dawowar Shettima za ta kasance bayan kammala dukkan muhimman muhawarori da aka shirya a taron.

Wannan sabon salon wakilcin, in ji Fadar Shugaban Ƙasa, ya nuna muhimmancin da gwamnatin Najeriya ke bai wa batun tsaro a cikin gida da kuma rawar da ƙasar ke son takawa a matakin duniya.

A cikin bayanin sa, mai magana da yawun Mataimakin Shugaban Ƙasa, Stanley Nkwocha, ya bayyana cewa “Mataimakin Shugaban Ƙasa ya tashi yau domin wakiltar Shugaban Ƙasa a taron G20. Shugaban Ƙasa ya ɗage tafiyarsa domin ci gaba da karɓar bayanan tsaro kan abubuwan da suka faru kwanan nan.”

Ya ce Shettima zai halarci tattaunawar da za ta gudana kan tattalin arziƙi, tsaro da cigaban ƙasashe masu tasowa, kafin dawowarsa Najeriya.