Ɗan takarar ADC a Anambra ya kira sakamakon zaɓen gwamnan jihar a matsayin abin allawadai

Ɗan takarar jam’iyyar African Democratic Congress (ADC) a zaɓen gwamnan Anambra na 8 ga Nuwamba, John Nwosu, ya yi watsi da sakamakon zaɓen, yana mai cewa abin da ya gudana “ba zaɓe ba ne, kuma tsarin ya miƙa wuya ga ta’asar cin hanci.”

TIMES HAUSA ta rawaito cewa Farfesa Edoba Omoregie, Mai Tattara Sakamakon Zaɓe daga INEC kuma Mataimakin Shugaban Jami’ar Benin, ya tabbatar da nasarar Gwamna Charles Soludo na APGA da ƙuri’u 422,664.

Nicholas Ukachukwu na APC ne ya biyo baya da ƙuri’u 99,445, yayin da Nwosu ya samu ƙuri’u 8,208.

Nwosu ya zargi cewa sakamakon bai wakilci muradin jama’a ba, inda ya ce an yi “sayen kuri’u cikin fili.”

Ya bayyana, “A kusan kowace rumfar zabe, an riƙa raba ₦3,000 zuwa ₦20,000 ga masu zaɓe. Wannan babban abin kunya ne da cin fuskar demokaraɗiyya.”

Ya ƙara da cewa, “Gaskiyar nasara tana cikin ingancin tsari, ba yawan ƙuri’u ba. Zaɓe cike da rashawa ba zai taɓa zama muryar jama’a ba.”

TIMES HAUSA ta kuma tattaro cewa Nwosu ya zargi hukumomin da ya kamata su kare amincin zaɓe da “gaza aikinsu gaba ɗaya”.

“Lokacin da ake sayen ƙuri’a, ana sayar da makomar ƙasa. Abin da ya faru ba zaɓe ba ne, sai dai nuna yadda cin hanci ya rinjayi gaskiya,” in ji shi.

Ya gode wa jam’iyyarsa da mabiyansa kan “tsayawa kan gaskiya duk da tursasawar da suka samu.”

Tinubu ya taya Soludo murna

TIMES HAUSA ta tattaro daga fadar shugaban ƙasa cewa Shugaba Bola Tinubu ya taya Soludo murnar nasarar da ya samu, yana kiransa “gwamna mai hangen nesa” da ya yi tasiri ga Jihar Anambra.

Tinubu ya yaba da zaɓukan cikin lumana tare da jinjinawa INEC da jami’an tsaro.

Ya ce, “Soludo ya nuna irin jagoranci mai ma’ana da ya inganta jihar. Ziyarata a watan Mayu da buɗe ayyukan ci gaba da ya yi tana nan a zuciyata.”

Shugaban ya buƙaci Soludo ya haɗa kai da abokan hamayya, yana mai cewa nasarar APGA “alamar ƙarfin demokaraɗiyya ce.”

Ya kuma jinjinawa sabon Shugaban INEC, Farfesa Joash Amupitan, saboda gudanar da “zaɓe mai gaskiya.”