Ɗan Majalissar Wakilan da NNPP ta dakatar ya koma APC, Zai yi wa Tinubu aiki a 2027

Ɗan Majalisar Tarayya mai wakiltar Kiru/Bebeji, Abdulmumin Jibrin Kofa, ya sanar da komawarsa jam’iyyar APC, tare da bayyana cikakken goyon bayansa ga ƙoƙarin Shugaba Bola Tinubu na neman wa’adi na biyu a 2027.

A wani taron siyasa da ya gudanar a garinsa na Kofa, ƙaramar hukumar Bebeji a Kano, ranar Lahadi, Jibrin ya bayyana komawarsa APC, shekaru biyu bayan barin jam’iyyar a 2022.

TIMES HAUSA ta tattaro daga sanarwar da Kofa ya wallafa a shafinsa na Facebook cewa magoya bayansa sun yanke hukuncin barin NNPP/Kwankwasiyya gaba ɗaya domin komawa APC.

Ya rubuta cewa, “A yau dubban magoya bayana sun tarbe ni a Kofa. An yanke shawarar barin NNPP/Kwankwasiyya, komawa APC, tare da mara wa Shugaba Bola Ahmed Tinubu baya domin wa’adi na biyu.”

Ya ƙara da cewa fiye da malamai 2,000 daga yankinsa sun yi addu’o’i na musamman domin nasarar Shugaba Tinubu tare da roƙon zaman lafiya da ci gaba ga Bebeji, Kano da Najeriya baki ɗaya.

Tarihin fitarsa daga NNPP

Komawarsa APC na zuwa ne watanni biyu bayan da jam’iyyar NNPP ta dakatar da shi bisa zargin saɓa wa ƙa’idojin jam’iyya da kuma ƙin biyan kuɗin kasancewa memba.

A lokacin, Jibrin ya ce hukuncin dakatar da shi, “Abu ne mai tayar da hankali kuma ba shi da tushe.”

Ya zargi jam’iyyar da tauye ƴancin sa da rashin bin ƙa’ida a lokacin.

Ya bayyana cewa ba zai ƙalubalanci hukuncin a kotu ba, yana mai cewa ya karɓi abin “da hannu bibiyu.”

Jibrin, wanda tsohon Daraktan Kamfen na Tinubu Support Groups ne, ya zargi NNPP da “rashin daraja” ga mambobinta, duk da cewa ya gode wa jam’iyyar bisa goyon bayan da ta ba shi a lokacin abubuwan da suka gabata.

Ya buƙaci magoya bayansa su kasance da shi cikin sabuwar tafiyar, tare da kiyaye zaman lafiya da waɗanda suka zaɓi ci gaba da zama a NNPP.

Komawarsa APC na zaman wata babbar ƙarfafawa ga jam’iyyar a Kano, musamman a daidai lokacin da manyan jam’iyyu ke sake ɗinke kawunansu kafin zaɓen 2027.