Ƴan Sanda a Jigawa sun kama ƴan fashi, masu kisan kai da ɓarayin motoci bayan zuzzurfan bincike

Rundunar Ƴan Sandan Jihar Jigawa ta tabbatar da kama wasu da ake zargi da laifukan fashi da makami, kisan kai, da satar motoci sakamakon cigaba da aikin leƙen asiri da haɗin gwiwa tsakanin hukumomin tsaro.

Kwamishinan ƴan sandan, CP Dahiru Muhammad, ya yaba da yadda jami’ansa ke gudanar da ayyuka cikin tsanaki tare da tabbatar da tsaro ga al’ummar jihar.

Sanarwar da rundunar ta fitar a ranar 8 ga Nuwamba 2025 ta nuna cewa kama waɗanda ake zargin ta biyo bayan rahotanni masu inganci da bincike mai zurfi.

TIMES HAUSA ta fahimci cewa a farkon lamarin, rundunar ta kama Auwalu Haladu na garin Buju (Ƙaramar Hukumar Dutse) da Safiyanu Shuaibu na Maimakawa (Ƙaramar Hukumar Gaya, Jihar Kano), bisa zargin cewa a ranar 19 ga Oktoba 2025 sun haɗa baki da waɗansu mutane biyu da suka tsere, suka jawo wani mutum mai suna Rabo zuwa daji inda suka harbe shi da bindar gargajiya suka kuma ƙwace babur ɗinsa.

Bayan samun rahoto, jami’an Sashen Leƙen Asiri na Dutse (SID) sun kama manyan waɗanda ake zargin, yayin da ake cigaba da neman sauran waɗanda suka tsere.

Hukumomi sun miƙa waɗanda ake zargi zuwa rundunar Ƴan Sanda ta Kano domin ci gaba da bincike da gurfanarwa.

A wani lamarin na dabam, jami’an ƴan sanda na Dutse sun kama Musbahu Sabo (mai shekaru 25, daga Ringim) da Asabe Yahaya, wacce aka fi sani da Reza (ƴar shekaru 45, daga Danmasara), bisa zargin mallakar wata motar Toyota Pickup GWA 136 AI da ake zargin ta sata ce.

TIMES HAUSA ta gano cewa waɗanda ake zargin sun bayyana cewa sun haɗa baki da wasu mutane uku da suka haɗa da Arma, Idris da Yusuf, daga Danmasara wajen jigilar motar daga Hadejia zuwa Dutse domin sayarwa.

Bincike ya kuma gano cewa Musbahu na da hannu a satar babur a Takur Site a Birnin Dutse.

Rundunar ta ce za a tura dukkan zarge-zargen zuwa Sashen Binciken Manyan Laifuka (SCID) domin bincike mai zurfi da gurfanar da waɗanda ake zargi a kotu.

CP Dahiru Muhammad ya yabawa jami’an da suka gudanar da ayyukan cikin ƙwarewa, yana mai cewa rundunar za ta ci gaba da inganta tsaro ta hanyar leƙen asiri, haɗin kai da al’umma, da tsauraran matakan sintiri.

Ya kuma buƙaci jama’a su ci gaba da bayar da rahotanni masu inganci domin hana aikata laifuka a Jigawa.