Ƴan sanda a Jigawa suka cafke manyan dillalan miyagun ƙwayoyi, suka ƙwato ƙwayoyi da kuɗaɗe

Rundunar Ƴan Sanda ta Jihar Jigawa ta ce ta samu nasarar kama wasu fitattun dillalan miyagun ƙwayoyi a garuruwan Dutse, Guri, Babura, Kanya Babba, Bulangu da Yankwashi, a wani jerin samamen da aka gudanar domin murƙushe safarar kwayoyi a jihar.

Sanarwar runduna ta bayyana cewa bayan samun sahihan bayanan sirri, jami’an da ke gudanar da samamen sun ƙwato ƙwayoyi 8,271 nau’uka daban-daban, ciki har da Exol, D5, Tramadol, Diazepam, rubber solution, “suck and die,” da ganyen tabar wiwi.

Haka kuma an gano kuɗi ₦235,225, wanda ake zargin kuɗaɗen haramun ne da aka samu daga sayar da miyagun ƙwayoyi.

Sunayen waɗanda ake zargi

TIMES HAUSA ta tattaro cewa rundunar ta bayyana sunayen waɗanda ake zargin kamar haka:

1. Bashir Abdulkadir, mai shekaru 20, Gida Dubu Quarters

2. Usman Abubakar, mai shekaru 20, Fagoji Quarters

3. Yusuf Abdulkadir

4. Rabilu Musa

5. Muhammad Abdulkadir

6. Friday Onna, mai shekaru 37, Arin, Guri LGA

7. Ibrahim Ibrahim Girema, mai shekaru 40, Babura Kofar Gabas

8. Muawiyya Ishaka, mai shekaru 18, Afuware village

9. Nura Abdullahi, mai shekaru 20, Babura Kofar Arewa

10. Sani Hamisu, mai shekaru 32, Karkarna, Yankwashi LGA

11. Muhd Sani, mai shekaru 36, Hadejia LGA

12. Muhd Isyaku, mai shekaru 29, Kullimi village

13. Kabiru Yakubu, mai shekaru 25, Unguwar Giwa, Batali Babura LGA

14. Abdulmumini Inuwa, mai shekaru 19, Dukawa, Danbatta LGA, Kano State

Rundunar ta ce dukkan waɗanda ake zargi suna hannun jami’an bincike, suna bayar da bayanan da za su taimaka wajen gano tushen hanyoyin samun ƙwayoyin da kuma waɗanda ke taimaka musu a ciki da wajen jihar.

Kwamishinan ƴan sanda na Jihar Jigawa, CP Dahiru Muhammad, ya jinjinawa jami’an da suka gudanar da samamen, yana mai cewa rundunar ba za ta yi sassauci ba wajen kawar da miyagun ƙwayoyi daga jihar.

Ya kuma buƙaci jama’a da su riƙa ba rundunar bayanai a kan lokaci, domin taimakawa yaƙi da safarar ƙwayoyi.

Rundunar ta ce za a gurfanar da waɗanda ake zargi a kotu bayan kammala bincike.