Ƴan Bindiga Sun Kutsa Makarantar Firamare da Sikandire, Sun Sace Ɗalibai Da Malamai A Neja

Ƴan bindiga sun sake tayar da hankalin al’umma a Jihar Neja, bayan sun kai mummunan hari a St. Mary’s Primary and Secondary School, Papiri, da ke Ƙaramar Hukumar Agwara, inda suka yi awon gaba da ɗalibai da malamai da dama a wani hari da ya faru a tsakar daren da ya gabata.

Makarantar, wacce ta kasance ta ɗariƙar Katolika kuma ke da ɗalibai maza da mata, ta fuskanci harin ne tsakanin ƙarfe 3 zuwa 4 na dare, lokacin da maharan suka mamaye yankin cikin yawan gaske.

Wata majiya ta ƙauyen Agwara ta shaida wa manema labarai cewa maharan sun isa ne a kan kusan babura 60, tare da wata mota da suka zo da ita, sannan suka buɗe wuta kan ma’aikacin tsaron makarantar, wanda yanzu haka ke kwance cikin munanan raunuka.

“Eh, lamarin ya faru ne tsakanin ƙarfe 3 da 4 na dare. Ba a tantance adadin ɗaliban da aka sace ba tukuna,” in ji majiyar.

Wata majiya ta daban ta tabbatar da cewa maharan sun kuma yi awon gaba da wasu malamai na makarantar yayin harin.

A cewar wata majiya da TIMES HAUSA ta tuntuba, “A tsakiyar dare, maharan sun mamaye St. Mary’s Primary and Secondary School, Papiri, suka tafi da ɗalibai da malamai da dama. Wannan lamari na da matuƙar tayar da hankali ga iyalai, Jihar Neja, da al’ummar Najeriya gaba ɗaya. Waɗannan yara da malamai ba su da wani laifi, kuma amincinsu dole ne ya zama abin bai wa fifiko.”

Har yanzu hukumomi ba su tabbatar da adadin yawan waɗanda aka sace ba, sai dai manyan majiyoyi na yankin na tsoron cewa adadin na iya kaiwa fiye da mutane 100.

Rundunar Ƴan Sanda Ta Tashi Tsaye

Rundunar Ƴan Sandan Jihar Neja ta tabbatar da faruwar harin, inda Jami’in Hulɗa da Jama’a, SP Wasiu Abiodun, ya bayyana cewa an tura rundunoni na musamman, sojoji, da sauran jami’an tsaro domin gudanar da bincike da gudanar da aikin ceto.

TIMES HAUSA ta gano cewa jami’an tsaro sun bazama cikin dazukan yankin don nemo waɗanda aka sacen ba tare da ɓata lokaci ba.

Kwamishinan Ƴan Sandan Jihar Neja, CP Adamu Elleman, ya roƙi jama’a su kwantar da hankali tare da ba da bayanai masu amfani ga jami’an tsaro.

Amma ya nuna rashin jin daɗinsa ga yadda makarantar ta ci gaba da aiki duk da umarnin gwamnatin jiha na a rufe dukkan makarantun kwana a yankin saboda barazanar tsaro.

Ɗumbin Sace-Sacen Dalibai Na Ƙara Ƙamari

Harin na Papiri ya zo ne ƙasa da mako guda bayan sace ɗalibai 25 daga Government Girls Comprehensive Senior Secondary School, Maga, a Jihar Kebbi, har ma aka kashe Mataimakin Shugaban Makarantar, Malam Hassan Makuku, yayin da yake ƙoƙarin kare ɗalibansa.

TIMES HAUSA ta kuma kawo muku cewa a wani hari na daban a Eruku, Jihar Kwara, an yi garkuwa da aƙalla masu ibada 30, yayin da mutane uku suka rasa rayukansu.

Shugaban ƙasa Bola Tinubu ya yi Allah-wadai da hare-haren, sannan Mataimakinsa, Kashim Shettima, ya ziyarci Maga a madadinsa.

Daga dukkan alamu, barazanar tsaro da ta shafi makarantun arewacin Najeriya na ƙara taɓarɓarewa, inda iyaye ke shiga damuwa, gwamnati na ƙoƙarin shawo kan matsalar, amma har yanzu matsin lambar na ƙaruwa.