Saraki ya buƙaci PDP ta dakatar da Gangamin Ƙasa, ta kafa shugabannin riƙon ƙwarya

Tsohon Shugaban Majalisar Dattawa, Dr. Bukola Saraki, ya shawarci jam’iyyar PDP da ta dakatar da taron ƙasa da aka shirya gudanarwa a ranar 15 zuwa 16 ga Nuwamba a Ibadan, jihar Oyo, yana mai gargaɗin cewa ci gaba da shirin a irin wannan lokaci zai ƙara rura rikicin cikin gida da kuma haifar da rikicin shari’a da ka iya lalata sakamakon taron.

Saraki, wanda ya jagoranci Majalisar Dattawa daga 2015 zuwa 2019, ya bayyana haka ne a wata sanarwa da ya fitar a ranar Laraba, jim kaɗan bayan ganawarsa da Kwamitin Sulhu na Majalisar Amintattu (BoT) na jam’iyyar PDP ƙarƙashin jagorancin Hassan Adamu.

Ya ce ya kamata shugabannin jam’iyyar da ke goyon bayan Umar Damagun, wanda shi ne shugaban jam’iyyar na ƙasa, su dakatar da taron, kasancewar akwai umarnin kotuna biyu masu karo da juna da ke iya sa taron ya zama ba bisa doka ba, tare da kawo cikas ga zaman lafiyar jam’iyyar.

“Na bayyana baƙin cikin da ke damuna cewa duk da ƙoƙarin sulhu da wasu daga cikinmu suka yi, taron ya shiga cikin rikicin siyasa da na shari’a. Wannan ba alheri ba ne ga jam’iyyarmu da kuma demokaraɗiyyar ƙasar nan,” in ji Saraki.

“Na kuma jaddada cewa batutuwan siyasa ba su dace a warware su ta hanyar kotu ba. Sulhu tsakanin ɓangarori daban-daban ne kawai zai kawo zaman lafiya,” in ji shi.

TIMES HAUSA ta tattaro cewa rikicin cikin PDP ya samo asali ne daga bayan zaɓen 2023, inda jam’iyyar ta kasu gida biyu, wani ɓangare na goyon bayan Ministan Babban Birnin Tarayya (FCT), Nyesom Wike, yayin da ɗaya bangaren ke tare da Umar Damagun.

Ɓangaren Wike, wanda Samuel Anyanwu ke jagoranta a matsayin sakatare na ƙasa mai rikici, ya naɗa Mohammed Abdulrahman a matsayin shugaban riƙon ƙwarya, bayan da suka sanar da dakatar da Damagun da tawagarsa.

Wike, duk da kasancewarsa ɗan PDP, na cikin majalisar ministocin Shugaba Bola Tinubu na jam’iyyar APC mai mulki, abin da wasu ke kallo a matsayin siyasar cin amanar jam’iyya.

Rikicin ya kai ga umarnin kotuna masu karo da juna, inda Kotun Tarayya a Abuja, ƙarƙashin Alƙali James Omotosho, ta hana taron, yayin da kotun Jihar Oyo ta ba da umarni a ci gaba da shi.

A ranar Talata kuma, Kotun Tarayya ta sake dakatar da taron bisa ƙarar da tsohon gwamnan Jigawa, Sule Lamido, ya shigar.

Saraki ya bayyana cewa ba zai shiga cikin taron ba a irin wannan yanayi.

“A matsayina na jagora, ba zan shiga wani abu da zai iya cutar da muradun mutanena ba,” in ji shi.

Don haka, ya bayar da shawarar kafa kwamitin riƙon ƙwarya a cikin kwanaki biyu domin tafiyar da harkokin jam’iyyar har sai an kai ga samun cikakken sulhu.

“Hanyar samun daidaito da zaman lafiya ita ce a kafa kwamitin riƙon ƙwarya yanzu, wanda zai kula da jam’iyya har zuwa lokacin da aka samu haɗin kai,” in ji shi.

Saraki ya kuma yi gargaɗin cewa ci gaba da samun rashin tabbas cikin jam’iyyar na iya korar masu neman takara daga amfani da dandalin PDP a nan gaba.