Kotu ta sake dakatar da PDP daga gudanar da gangamin ƙasa saboda hana Lamido takara

Babbar Kotun Tarayya da ke Abuja ta sake dakatar da jam’iyyar PDP daga gudanar da taron gangamin ƙasa da ta shirya yi a Ibadan, Jihar Oyo, a ranar 15 da 16 ga Nuwamba.

TIMES HAUSA ta samo daga Channels Television cewa kotun ta kuma hana Hukumar Zaɓe ta Ƙasa (INEC) sa ido ko amincewa da sakamakon duk wani taro da jam’iyyar za ta yi a waɗannan ranaku.

Mai shari’a Justice Peter Lifu ne ya bayar da wannan umarni yayin da yake yanke hukunci kan buƙatar gaggawa da tsohon gwamnan Jigawa, Sule Lamido, ya shigar.

Lamido ya ce an hana shi sayen fom ɗin takarar kujerar shugaban jam’iyya na ƙasa, matakin da ya ware shi daga shiga zaɓen sabbin shugabannin jam’iyyar.

A cewar alƙalin, jam’iyyar ta yi watsi da ƙa’idojin da doka ta shimfiɗa, musamman rashin wallafa jadawalin taron kamar yadda doka ta tanada.

Ya ce shaidun da ke gabansa sun nuna cewa PDP ta zo da tsarin da bai cika sharuɗɗan doka ba, don haka ya zama dole kotu ta tsoma baki domin kare tsarin demokaraɗiyya.

Justice Lifu ya bayyana cewa idan aka bar jam’iyyar ta ci gaba da shirye-shiryen taron, Lamido zai fuskanci mummunan lahani fiye da sauran ɓangarori.

Ya ƙara da cewa tsarin mulkin 1999 ya ba kotuna damar tabbatar da adalci ba tare da tsoron wata takura ba.

A hukuncinsa na ƙarshe, alkalin ya haramtawa PDP gudanar da taron gangami a Ibadan ko wani wuri a ƙasar nan, a waɗannan ranaku ko a wata rana ta daban.

Haka kuma ya hana INEC shiga ko amincewa da sakamakon duk wani taro makamancin haka.

TIMES HAUSA ta fahimci cewa, a watan Oktoban 2025, wata kotu a Abuja ta dakatar da jam’iyyar daga taron Ibadan, inda Justice James Omotosho ya umurci PDP da ta tsaya cak har sai ta bi tsarin dokokin jam’iyya, kundin tsarin mulkin ƙasa da dokar zabe.

Wannan ƙarar ta fito ne daga wasu jiga-jigan jam’iyyar da suka ce taron Ibadan ya saɓawa dokoki.

Sai dai a ranar 4 ga Nuwamba, Babbar Kotun Jihar Oyo ta ba jam’iyyar damar cigaba da shirin taron, bayan Justice Akintola ya amince da buƙatar gaggawa da aka shigar a madadin jam’iyyar.

Duk da haka, alƙalin ya jinkirta wata sabuwar ƙara da aka shigar a kan batun, domin ɓangarorin su kammala musayar hujjoji kafin shari’ar asali ta fara.