Gwamnan Taraba Ya Umurci Dakatar Da Dukkan Makarantun Jihar Saboda Matsalar Tsaro

Gwamnan Jihar Taraba, Agbu Kefas, ya ba da umarni cewa dukkan makarantun sakandire na gwamnati da masu zaman kansu su gaggauta komawa tsarin je-ka-ka-dawo (day-school), a matakin da gwamnati ta ɗauka saboda tsananin taɓarɓarewar tsaro a faɗin Najeriya.

Wannan umarni ya fito ne a cikin wata sanarwa da Kwamishinan Ilimi na jihar, Dr Augustina Godwin, ta sanyawa hannu a ranar Juma’a, wadda TIMES HAUSA ta bibiya.

Sanarwar ta bayyana cewa tsananin yawaitar hare-haren garkuwa da ɗalibai, musamman bayan sace ɗaliban Kebbi da Niger, ya sanya ɗaliban makarantun kwana zama cikin barazanar miyagun laifuka a Najeriya.

A cewar Dr Godwin, Gwamna Kefas ya umarci dukkan makarantun sakandire a jihar – na gwamnati da masu zaman kansu – da su dakatar da tsarin kwana nan take.

A cikin kalamanta, ta ce: “La’akari da halin da ake ciki, Gwamna Kefas ya bayar da umarnin cewa dukkan makarantun sakandire, na gwamnati da na masu zaman kansu, su koma tsarin je-ka-ka-dawo. An umarci shugabannin makarantun su gaggauta sallamar ɗalibai.”

Ta bayyana cewa matakin ya zama wajibi domin kare rayukan ɗalibai da kuma hana matsalolin tsaro da ke ƙara ɗaukar sabon salo a yankin.

Gwamnatin Taraba ta kuma tabbatar wa iyaye da al’umma cewa tana aiki kafaɗa-da-kafaɗa da hukumomin tsaro domin tabbatar da zaman lafiya, tare da ci gaba da bibiyar lamarin.

Haka kuma, an umarci shugabannin makarantun su ƙara tsaurara tsaro a cikin haraba da wajen makarantun.

Wannan umarni na zuwa ne jim kaɗan bayan sace ɗalibai 315 daga St. Mary’s School da ke ƙauyen Papiri a Agwara, Jihar Niger, a daren Juma’a.

Lamarin ya faru ne kwanaki kaɗan bayan harin da aka kai a Maga, Jihar Kebbi, inda aka yi garkuwa da ɗalibai 25, lamarin da ya ƙara tayar da hankulan al’umma kan tsaro a makarantun Arewa.