Gwamnan Plateau, Caleb Mutfwang, ya fice daga PDP zuwa APC

Gwamnan Jihar Plateau, Caleb Mutfwang, ya sauya sheƙa daga jam’iyyar Peoples Democratic Party (PDP) zuwa jam’iyya mai mulki, All Progressives Congress (APC), lamarin da ya haifar da gagarumin sauyi a taswirar siyasar Arewa ta Tsakiya.

An sanar da sauya sheƙar ne a hukumance ta bakin Shugaban APC na Ƙasa, Nentawe Yilwatda, a yayin zama na 14 na Kwamitin Ƙoli na Jam’iyyar APC (National Caucus) da aka gudanar a State House Conference Centre, Abuja, a ranar Alhamis.

Yilwatda, wanda shi ma ɗan asalin Jihar Plateau ne, ya bayyana cewa shigar Mutfwang APC ya ƙara ƙarfin jam’iyyar a yankin Arewa ta Tsakiya baki ɗaya.

“Da sauya sheƙar Gwamna Mutfwang, ɗaukacin yankin Arewa ta Tsakiya yanzu yana ƙarƙashin mulkin APC,” in ji shugaban jam’iyyar.

TIMES HAUSA ta tattaro cewa wannan mataki na nuni da gagarumin sauyin siyasa a Jihar Plateau, kuma ana sa ran zai yi tasiri sosai ga tsarin jam’iyyun siyasa gabanin zaɓukan da ke tafe.

Tsawon sama da shekara guda, rahotanni da jita-jita sun daɗe suna yawo a fagen siyasa cewa Gwamna Mutfwang na duba yiwuwar sauya sheƙa zuwa APC.

Waɗannan hasashe sun ƙarfafa ne sakamakon kusancinsa da manyan jiga-jigan jam’iyyar APC da kuma yadda yake ƙara amincewa da dukkan shirye-shiryen gwamnatin tarayya.

Rahotannin baya-bayan nan daga BusinessDay, kamar yadda TIMES HAUSA ta duba, sun nuna cewa wasu matakai da dabarun siyasa da gwamnan ya ɗauka tun da wuri sun kasance alamun shirye-shiryen sauya akalar siyasa, tun kafin sanarwar sauya sheƙar.

Gwamna Mutfwang ya samu nasarar lashe zaɓen gwamna na shekarar 2023 ne a ƙarƙashin jam’iyyar PDP, kuma yanzu ya zama ɗaya daga cikin manyan ƴan siyasar adawa da suka fice daga jam’iyyar a baya-bayan nan.

Da yake sharhi kan lamarin, John Akans, Mai Bai wa Gwamnan Shawara na Musamman kan Harkokin Jam’iyyun Siyasa, ya bayyana cewa shawarar sauya sheƙar ba ta kasance ta gwamnan shi kaɗai ba.

A wata tattaunawa ta wayar tarho da BusinessDay, Akans ya ce an ɗauki matakin ne bayan doguwar tuntuɓa da masu ruwa da tsaki a faɗin jihar.

“Ba shawara ce ta mutum guda ba. An tattauna da shugabannin jam’iyya, abokan siyasa da kuma magoya baya a matakin ƙasa, jiha da mutanen karkara kafin ɗaukar wannan mataki,” in ji shi.

Ya ƙara da cewa sauya sheƙar na nuna muradin haɗin gwiwa na masu ruwa da tsaki da ke ganin matakin zai bai wa Plateau damar jawo ƙarin ayyukan gwamnatin tarayya, ƙarfafa haɗin kai da kuma hanzarta ci gaba.

Akans ya jaddada cewa gwamnan zai ci gaba da mutunta amanar da al’ummar jihar suka ba shi, ba tare da la’akari da jam’iyyar da yake ciki ba.

Ya bayyana sauya sheƙar a matsayin “motsi na siyasa” ba wai canjin jam’iyya kawai ba, yana mai cewa manufarsa ita ce inganta shugabanci da tabbatar da cewa Plateau ba ta tsaya a gefe a lissafin siyasar ƙasa ba.

Ya kuma tabbatar wa mazauna jihar cewa tsaro, zaman lafiya, haɗin kai da kyakkyawan shugabanci za su ci gaba da kasancewa ginshiƙan mulkin Gwamna Mutfwang.