Boko Haram Ta Kashe Mutum Takwas, Ta Yi Garkuwa da Masunta Uku A Borno

Aƙalla mutane takwas sun rasa rayukansu a Warabe, ƙauye da ke ƙaramar hukumar Gwoza ta Jihar Borno, bayan harin da ake zargin Boko Haram ce ta kai musu a cikin daji.

Bakwai daga cikin waɗanda suka mutu ƴan Civilian JTF ne waɗanda suka shiga daji neman itace domin tallafa wa ayyukan tsaro a yankin.

A cewar majiyoyi, maharan sun kai harin ne ta babura, yayin da wasu daga cikinsu suka taso a ƙafa suna ɗauke da manyan bindigogi, lamarin da ya rinjayi tsaron mutanen yankin.

Rahoton HumAngle, wanda TIMES HAUSA ta bibiya, ya bayyana cewa lokacin musayar wutar mai tsanani, maharan sun yi amfani da wayar ƴan Civilian JTF da suka kashe domin kiran ƙarin maƙwabta su zo su taimaka musu.

An kuma tabbatar da cewa maharan sun yi garkuwa da wasu masunta uku daga unguwar tare da kwashe makaman su.

Har yanzu wasu uku ba a same su ba, lamarin da ya haifar da tsananin fargaba a yankin.

Warabe ba shi da sansanin sojoji na dindindin; hakan ya sa Civilian JTF ke zama katangar tsaro ta farko ga mazauna yankin.

Sansanin sojojin da ya fi kusa yana Pulka, kimanin kilomita bakwai, yayin da Gwoza ke kusan kilomita 15 daga ƙauyen.

Mazauna yankin sun bayyana cewa wannan tazara na kawo jinkirin isowar rundunonin tsaro idan an samu hari.

Har ila yau, yanayin tsaunuka da dazukan Mandara, wanda ya mamaye iyakar Najeriya da Kamaru, yana bai wa Boko Haram cikakkiyar mafakar ɓoyewa da hanyoyin kutse, wanda ke mai da yankin Warabe cikin haɗari.

Wannan hali ya sa Boko Haram ke iya kai farmaki cikin gaggawa sannan su tsere cikin wuraren da jami’an tsaro ke ƙorafi wajen shiga.

Rahoton ya kuma ce jami’an tsaro sun fara bincike, duk da yake har zuwa lokacin buga wannan labari babu wata sanarwa ta hukuma da ta fito kai tsaye.

Wannan hari ya zo ne a daidai lokacin da Najeriya ke fuskantar sabon salo na tashin hankali, inda a kwanakin baya aka kashe sojoji, ƴan Civilian JTF, har da wani Brigadier-General a hare-haren da suka faru dabam-dabam.

Lamarin tsaro ya ƙara taɓarɓarewa a makon nan, domin a ranar Litinin ɓarayi sun kutsa GGCSS Kebbi, suka kashe wani ma’aikaci tare da yin garkuwa da ɗalibai 25.

Bayan kwana biyu, wasu maharan sun kai hari a wani coci a Kwara, inda suka kashe mabiya addini suka kuma yi garkuwa da kusan mutane 30.

A cewar Ministan Yaɗa Labarai, Mohammed Idris, Shugaba Bola Tinubu ya bada umarni ga hukumomin tsaro su koma matakin “highest alert level” domin taƙaita jinin da ke zuba ba ƙaƙƙautawa a ƙasar.